Avionët luftarakë polakë ngrihen në ajër pas sulmeve ruse ndaj Kievit

Avionë luftarakë të Polonisë u ngritën në ajër pranë kufirit me Ukrainën, pasi kryeqyteti ukrainas, Kiev, u godit gjatë natës nga raketa dhe dronë rusë. Ushtria polake tha se ndërmori masa “parandaluese” për të garantuar sigurinë e hapësirës së saj ajrore, duke vënë në gatishmëri edhe sistemet tokësore të mbrojtjes ajrore dhe zbulimin me radar.

Sipas Shërbimit Shtetëror të Emergjencave të Ukrainës, të paktën një person u vra dhe 28 të tjerë u plagosën nga sulmet, të cilat synuan infrastrukturën energjetike dhe zonat civile të Kievit. Presidenti ukrainas Volodymyr Zelensky deklaroi se Rusia lëshoi rreth 500 dronë dhe 40 raketa gjatë sulmeve të natës.

Fotografitë nga vendngjarja tregojnë ndërtesa banimi të dëmtuara rëndë dhe shtëpi të përfshira nga flakët. Kryebashkiaku i Kievit, Vitali Klitschko, njoftoi se mijëra ndërtesa kanë mbetur pa energji elektrike dhe ngrohje, ndërsa temperaturat kanë rënë nën zero. Po ashtu, 68 persona u evakuuan nga një azil pleqsh në rrethin lindor Darnytskyi.

Duke reaguar pas sulmeve, Zelensky përsëriti se Rusia “nuk dëshiron t’i japë fund luftës” dhe u bëri thirrje aleatëve perëndimorë të ndërmarrin hapa më të fortë kundër agresionit rus. “Raketat dhe dronët po flasin në emër të Moskës,” shkroi ai në Telegram.

Forcat e Armatosura të Polonisë konfirmuan më vonë se nuk pati shkelje të hapësirës ajrore polake. Ndërkohë, Ministria ruse e Mbrojtjes deklaroi se mbrojtja ajrore ruse shkatërroi shtatë dronë ukrainas gjatë natës.

Në planin diplomatik, Zelensky pritet të zhvillojë bisedime telefonike me udhëheqësit e Bashkimit Evropian dhe presidenten e Komisionit Evropian, Ursula von der Leyen, për rrugën drejt paqes. Ai gjithashtu do të takohet të dielën në Florida me Donald Trump, për të diskutuar një draft të ri 20-pikësh për përfundimin e luftës, i cili përfshin garanci sigurie nga SHBA-të, NATO-ja dhe aleatët evropianë.