Zelensky: Një javë duhet të jetë e mjaftueshme që Lukashenko të largojë pajisjet e përdorura nga Rusia

Presidenti ukrainas Volodymyr Zelensky tha sot se një javë duhet të jetë e mjaftueshme që udhëheqësi bjellorus Alexander Lukashenko të largojë nga vendi i tij pajisjet që Rusia përdori në sulmet ndaj Ukrainës, dhe nëse Lukashenko nuk e bën këtë, ai kërcënoi me veprime ukrainase, por nuk specifikoi detajet.

Zelensky tha në një konferencë për shtyp se në dy rajone bjelloruse që kufizohen me Ukrainën ka stacione transmetimi sinjalesh që forcat ruse i përdorin për të ndihmuar gjatë sulmeve ndaj civilëve ukrainas, raporton Reuters.

"Çfarë kuptimi ka të thuash se ai (Lukashenko) nuk dëshiron të jetë në luftë? Le ta heqë këtë pajisje, le ta fikë. Mendoj se një javë do të jetë e mjaftueshme që ai ta bëjë këtë", tha Zelensky. "Nëse ai nuk e bën, ne do ta bëjmë", tha Zelensky, pa zbuluar se si do ta bënte Ukraina.

Zelensky ka paralajmëruar vazhdimisht në muajt e fundit se Rusia po planifikon ta tërheqë Minskun më me forcë në luftën në Ukrainë. Forcat ruse përdorën territorin bjellorus për të nisur sulme që në shkurt të vitit 2022, në fillim të pushtimit të Ukrainës.Lukashenko kohët e fundit hodhi poshtë çdo ide se Minsk do të përfshihej më thellë në luftë, por tha se Bjellorusia do të mbrohej me Rusinë në rast agresioni.

Në një intervistë me televizionin Al Arabiya, Lukashenko tha se nuk ka arsye që Ukraina të ketë frikë nga Bjellorusia dhe se të dyja palët në luftë duhet të arrijnë një kompromis për ta përfunduar atë.

Rusia këtë javë akuzoi Ukrainën për një sulm fatal me dron ndaj një autobusi që transportonte fëmijë bjellorusë përmes Rusisë. Kievi ka mohuar përgjegjësinë. Një grua që shoqëronte fëmijët u vra dhe tetë persona, përfshirë gjashtë fëmijë, u plagosën në incident. Ministria e Punëve të Jashtme e Bjellorusisë tha se kishte kërkuar "shpjegime të plota" nga Ukraina.