Sulm rus në Kharkiv, një i vdekur dhe disa të plagosur, Moska deklaron se rrëzoi 187 dronë ukrainas

Një person ka humbur jetën dhe të paktën nëntë të tjerë janë plagosur si pasojë e bombardimeve ruse në qytetin Kharkiv, në verilindje të Ukrainës, sipas autoriteteve lokale.

Kryebashkiaku i qytetit, Igor Terekhov, bëri të ditur se sulmi ka goditur një zonë banimi, pasi forcat ruse përdorën bomba të drejtuara nga ajri. Gjatë operacioneve të kërkim-shpëtimit, ekipet e emergjencës nxorën nga rrënojat trupin e një burri që kishte mbetur i bllokuar në një ndërtesë të shkatërruar.

Edhe kreu i administratës ushtarake të rajonit të Kharkivit, Oleg Sinegubov, konfirmoi se nga sulmi i zhvilluar gjatë natës janë plagosur të paktën nëntë persona.

Ndërkohë, në një zhvillim paralel, Ministria ruse e Mbrojtjes njoftoi se sistemet e saj të mbrojtjes ajrore kanë rrëzuar 187 dronë ukrainas gjatë natës në territore të ndryshme të Rusisë, përfshirë edhe rajonin e Moskës.

Sulmet dhe kundërsulmet ajrore po vijojnë të thellojnë tensionet mes dy vendeve, ndërsa lufta në Ukrainë vazhdon të shkaktojë viktima dhe dëme në infrastrukturën civile.