Lavrov: Rusia s'ka qëllim të sulmojë vendet e BE-së a të NATO-s por çdo agresion do të marrë përgjigje

Ministri i Jashtëm rus, Sergei Lavrov, deklaroi se vendi i tij nuk ka asnjë qëllim për të sulmuar shtetet anëtare të BE-së ose NATO-s, por paralajmëroi për një “përgjigje vendimtare” ndaj çdo “agresioni” të drejtuar ndaj Moskës.

Në një fjalim të gjerë të mbajtur të shtunën në Asamblenë e Përgjithshme të OKB-së, Lavrov tha se kërcënimet ndaj Rusisë nga vendet perëndimore po bëhen “gjithnjë e më të zakonshme”.

Ai gjithashtu kritikoi Izraelin, duke thënë se, ndërsa Rusia dënon sulmet e Hamasit më 7 tetor 2023, nuk ekziston “asnjë justifikim” për “vrasjet brutale” të palestinezëve në Gaza ose për planet për aneksimin e Bregut Perëndimor.

Izraeli më parë ka deklaruar se operacioni i tij në Gaza është i nevojshëm për të mposhtur Hamasin.

Sipas ministrisë së shëndetësisë të kontrolluar nga Hamas, të paktën 65,926 persona kanë humbur jetën nga sulmet izraelite, ndërsa rreth 1,200 persona u vranë dhe 251 të tjerë u morën peng gjatë sulmeve më 7 tetor.

Lavrov kritikoi agresionin izraelit ndaj vendeve të tjera në Lindjen e Mesme, i cili rrezikonte të “shpërthente” rajonin.

Izraeli ka përdorur misionin e tij për të eleminuar Hamasin për të justifikuar sulmet ajrore ndaj vendeve të tjera të Lindjes së Mesme, përfshirë Katarin.

Përsa i përket Iranit, Lavrov akuzoi fuqitë perëndimore për sabotimin e diplomacisë pasi përpjekja e fundit, e udhëhequr nga Rusia dhe Kina, për të shtyrë rivendosjen e sanksioneve dështoi të premten. Ministri i Jashtëm rus e quajti këtë veprim “të paligjshëm”.

Sanksionet pritet të hyjnë në fuqi në orën 00:00 GMT të dielën.

Duke folur për tensionet në Europë, Lavrov tha: “Kërcënimet me forcë ndaj Rusisë, e akuzuar për planifikim praktik të një sulmi ndaj Aleancës Veriatlantike [NATO] dhe Bashkimit Evropian, po bëhen gjithnjë e më të zakonshme. Presidenti Putin ka hedhur poshtë vazhdimisht këto provokime.

“Rusia kurrë nuk ka pasur dhe nuk ka qëllime të tilla, por çdo agresion ndaj vendit tim do të marrë një përgjigje vendimtare.”

Moskva ka mohuar përgjegjësinë pas deklaratës së Danimarkës se dronë fluturuan mbi aeroportet e saj. Vetë Danimarka tha se incidentet dukeshin si punë e një “aktor profesional”, por nuk kishte prova të përfshirjes ruse.

Ndërkohë, Estonia ka akuzuar Rusinë për shkelje të hapësirës ajrore me avionë luftarakë, ndërsa një mision i mbrojtjes ajrore të NATO-s u zhvillua kohët e fundit mbi Poloni si pjesë e përgjigjes së aleatëve ndaj depërtimeve të dronëve rusë në hapësirën ajrore polake.

Presidenti amerikan Donald Trump shkoi aq larg sa tha se vendet e NATO-s duhet të qëllojnë avionët rusë në hapësirën e tyre ajrore, ndërsa vetë NATO paralajmëroi se do të përdorte “të gjitha mjetet ushtarake dhe jo-ushtarake të nevojshme” për t’u mbrojtur pas depërtimeve ushtarake të fundit.

Trump gjithashtu duket se ka ndryshuar qëndrimin e tij për luftën e Rusisë me Ukrainën, duke thënë këtë javë se Kievi mund të “rikuperojë të gjithë Ukrainën në formën e saj origjinale”.

Lavrov u ndal edhe te marrëdhëniet SHBA-Rusi në fjalimin e tij të shtunën, duke thënë: “Në qasjet e administratës aktuale amerikane, shohim një dëshirë jo vetëm për të kontribuar në mënyra për të zgjidhur realisht krizën ukrainase, por edhe një dëshirë për të zhvilluar bashkëpunim pragmatik pa adoptuar një qëndrim ideologjik.”

Në një kritikë të mëtejshme ndaj Perëndimit, Lavrov e vuri në dyshim kohën e njohjes së fundit nga disa vende, përfshirë Mbretërinë e Bashkuar dhe Francën, të një shteti palestinez – duke thënë se dukej sikur kishin pritur kaq shumë sepse shpresonin se “nuk do të kishte më asnjë dhe asgjë për t’u njohur”. /BBC - Syri.net/