Sërish shkelje në Mbretërinë e Bashkuar: Të dhënat personale të mijëra afganëve të zhvendosur ekspozohen pas sulmit kibernetik

Mijëra afganë të sjellë në Mbretërinë e Bashkuar përmes skemës së zhvendosjes dhe ndihmës Arap janë prekur nga një shkelje e re e të dhënave, pas një incidenti kibernetik që goditi një nënkontraktor të Ministrisë së Mbrojtjes. Inflite The Jet Centre, kompania që ofron shërbime tokësore për fluturimet në aeroportin Stansted, raportoi se një numër i kufizuar emailesh të saj u komprometuan, duke ekspozuar potencialisht emra, të dhëna pasaportash dhe detaje të aplikimeve të deri në 3,700 afganëve.

Qeveria britanike tha se incidenti nuk ka paraqitur rrezik për sigurinë e individëve dhe as nuk ka cenuar sistemet qeveritare, por megjithatë po informon të gjithë të prekurit. Afganët e përfshirë besohet se kanë udhëtuar në Mbretërinë e Bashkuar mes janarit dhe marsit 2024, ndërsa mes tyre raportohet të ketë edhe personel ushtarak britanik e ish-ministra konservatorë.

Ky zhvillim vjen vetëm një muaj pasi u bë publike një shkelje e vitit 2022, ku të dhënat e rreth 19,000 aplikantëve afganë për skemën Arap u ekspozuan gabimisht nga një zyrtar britanik. Organizata humanitare Sulha Alliance e cilësoi incidentin “të habitshëm”, duke theksuar se afganët që shpëtuan jetë britanikësh nuk duhet të përballen me kërcënime shtesë për jetën e tyre.

Ndërkohë, BBC raportoi se një pjesëtar i forcave speciale afgane, i përfshirë në shkeljen e parë të të dhënave, u deportua së fundmi në Afganistan, duke ngritur shqetësime serioze për sigurinë e tij dhe familjes. Ish-këshilltari i sigurisë kombëtare Sir Mark Lyall Grant e cilësoi situatën “thellësisht të turpshme” për qeverinë, ndërsa opozita kërkon një hetim të pavarur mbi standardet e sigurisë së Ministrisë së Mbrojtjes.

Zëdhënësit qeveritarë theksuan se të gjithë të kualifikuarit për zhvendosje duhet të kalojnë kontrolle të rrepta sigurie, por kritikët nënvizojnë se vonesat dhe dështimet administrative po vënë jetë njerëzish në rrezik të drejtpërdrejtë nga talebanët.