Papandreu: Inteligjenca artificiale si “hija në shpellën e Platonit” që rrezikon demokracinë

Inteligjenca artificiale po formëson mënyrën se si mendojmë, komunikojmë dhe zhvillojmë kulturën tonë politike, paralajmëroi ish-kryeministri grek George Papandreu gjatë një interviste për Euronews Next, duke tërhequr paralele të thella filozofike me alegorinë e shpellës së Platonit.

Në këtë metaforë të lashtë, njerëzit e ngujuar shohin vetëm hija të shtrembëruara të realitetit – një analogji që Papandreu e përdor për të përshkruar epokën moderne të mediave sociale dhe teknologjisë së avancuar.

Në Samitin e Kombeve të Bashkuara “Inteligjenca Artificiale për të Mirën” në Gjenevë, Papandreu shpjegoi se ashtu si të burgosurit në shpellë nuk arrijnë të shohin realitetin e plotë, edhe shoqëritë moderne mund të magjepsen nga “hijet” që paraqet inteligjenca artificiale. Sipas tij, përkundër pretendimeve se IA po demokratizon informacionin, realiteti është më kompleks dhe shpeshherë i centralizuar, ku algoritmet janë në duart e pak njerëzve.

Papandreu ngriti pyetje të forta rreth ndikimit të inteligjencës artificiale në demokraci dhe debatin publik: “A ndihmojnë platformat për debat të vërtetë, apo thjesht nxisin polarizim dhe dominim përmes pëlqimeve dhe komenteve?” Ai sugjeroi ndërtimin e platformave shtetërore që i japin zë qytetarëve, për të debatuar dhe bashkëvendosur për çështje si IA, ashtu si në demokracinë e Greqisë së Lashtë.

Ish-kryeministri theksoi gjithashtu rëndësinë e mendimit kritik në këtë epokë të informacionit të pamasë, duke cituar Sokratin: “E vetmja mençuri e vërtetë është të dish se nuk di asgjë”. Sipas Papandreut, kjo përulësi intelektuale është thelbësore për të kuptuar dhe përdorur me përgjegjësi fuqinë e teknologjisë. Në fund, ai paralajmëroi se nëse shoqëritë nuk bëjnë pyetjet e duhura për qëllimin dhe strukturën e IA-së, ajo mund të kthehet nga një mjet fuqizimi në një burim kontrolli dhe manipulimi./ Euronews - Syri.Net