Të paktën 12 të vrarë nga sulmet ajrore izraelite në Liban, përshkallëzohet tensioni me Hezbollahun

Të paktën 12 persona kanë humbur jetën nga një valë sulmesh ajrore izraelite në Luginën Bekaa lindore të Libanit, në një nga përshkallëzimet më të rënda që nga armëpushimi i nëntorit 2024 mes Izraelit dhe Hezbollahut. Sipas guvernatorit rajonal të Baalbek-Hermel, Bachir Khodr, mes viktimave janë shtatë shtetas sirianë – përfshirë një familje pesëanëtarëshe – dhe tre libanezë, të cilët u vranë në zonën Wadi Faara. Dy viktima të tjera u raportuan në qytetin Shmustar.

Ushtria izraelite (IDF) tha se sulmet kishin në shënjestër një sërë bazash ushtarake të Hezbollahut, përfshirë kampe stërvitore të lidhura me Forcën Radwan, njësi elitare komando e grupit të armatosur. Zëdhënësi i IDF në gjuhën arabe, Lt Col Avichay Adraee, deklaroi se operacionet kishin shkatërruar objekte që përdoreshin për ruajtjen e armëve dhe për aktivitet ushtarak të Hezbollahut.

Sipas IDF-së, këto objekte përbënin një “shkelje flagrante” të marrëveshjeve të armëpushimit dhe një kërcënim për sigurinë e Izraelit. Në një deklaratë të veçantë, ushtria izraelite kujtoi se kishte vrarë komandantët e Forcës Radwan në shtatorin e kaluar dhe se Hezbollah po përpiqej të rindërtonte aftësitë e njësisë së saj elitare. Ministri izraelit i Mbrojtjes, Israel Katz, e quajti këtë një “mesazh të qartë” për Hezbollahun dhe qeverinë libaneze, duke paralajmëruar se çdo përpjekje për rindërtimin e kapaciteteve ushtarake do të përballet me “forcën maksimale” të Izraelit.

Hezbollahu nuk ka komentuar ende për sulmet, ndërsa televizioni i tij, Al-Manar, i cilësoi ato si shkelje të armëpushimit dhe të sovranitetit të Libanit. Këto zhvillime kanë ringjallur frikën për rikthimin e luftës në vend, sidomos në periferi të Bejrutit ku janë raportuar masa sigurie të shtuara pranë shkollave.

Marrëveshja e armëpushimit e ndërmjetësuar nga SHBA në nëntor 2024 parashikonte zbatimin e plotë të rezolutës 1701 të OKB-së, që i dha fund luftës së vitit 2006. Ajo kërkonte tërheqjen e forcave të Hezbollahut në veri të lumit Litani dhe kontrollin e zonës nga ushtria libaneze dhe paqeruajtësit e OKB-së, ndërsa Izraeli duhej të tërhiqte plotësisht trupat nga jugu i Libanit – diçka që sipas Bejrutit ende nuk është realizuar plotësisht.

Situata mbetet e tensionuar, me një përballje të mundshme të re në horizont mes Izraelit dhe Hezbollahut, në një rajon që vazhdon të jetë skenë e brishtë e interesave strategjike dhe ushtarake.