Skandal në Mbretërinë e Bashkuar: Zbulohen të dhënat e 19 mijë afganëve që kishin bashkëpunuar me forcat britanike

Mbretëria e Bashkuar është përfshirë në një skandal të rëndë të shkeljes së të dhënave, pasi identiteti i gati 19,000 shtetasve afganë që kishin aplikuar për t’u zhvendosur në Britani pas pushtimit të Afganistanit nga talebanët, është zbuluar gabimisht në vitin 2022.

Rrjedhja e të dhënave, që ndodhi përmes një spreadsheet-i të dërguar në mënyrë të paautorizuar nga një zyrtar i Ministrisë së Mbrojtjes, ka vënë në rrezik serioz jetën e mijëra njerëzve që kishin ndihmuar forcat britanike gjatë misionit ushtarak në Afganistan.

Sekretari britanik i Mbrojtjes, John Healey, në një deklaratë para Dhomës së Komunave të martën, kërkoi falje publike për incidentin dhe tha se ishte thellësisht i shqetësuar për mungesën e transparencës që kishte shoqëruar këtë ngjarje. Ai konfirmoi se qeveria e mëparshme konservatore kishte krijuar fshehurazi një program për të sjellë në Britani të prekurit dhe familjet e tyre, pas rrjedhjes së të dhënave që ndodhi fillimisht në fillim të vitit 2022 dhe që më pas u publikua pjesërisht në rrjete sociale në gusht 2023.

Programi sekret, i quajtur “Rruga e Përgjigjes në Afganistan”, u bë publik vetëm tani, pasi qeveria laburiste hoqi një urdhër të jashtëzakonshëm që e mbante të klasifikuar skemën. Deri më sot, rreth 4,500 persona janë zhvendosur përmes kësaj rruge, ndërsa numri i përgjithshëm pritet të arrijë në 6,900 deri në mbylljen e programit, me një kosto rreth 850 milionë paundësh.

Megjithatë, qeveria përballet edhe me pasoja ligjore. Firma juridike Barings Law, e cila përfaqëson qindra viktima të shkeljes së të dhënave, e akuzoi Ministrinë e Mbrojtjes për përpjekje për të fshehur skandalin nga publiku. Sipas kreut të mbrojtjes së të dhënave të firmës, Adnan Malik, bëhet fjalë për një “shkelje tepër serioze”, që ka vënë në rrezik personat që kontribuuan në përpjekjet perëndimore për të mposhtur terrorizmin dhe për të sjellë stabilitet në Afganistan.

Që nga rënia e Kabulit në gusht 2021, rreth 36,000 afganë janë zhvendosur në Mbretërinë e Bashkuar përmes disa programeve të ndryshme, por kjo shkelje e rëndë e sigurisë ka vënë në pikëpyetje besueshmërinë e institucioneve britanike dhe ka ngritur alarmin për mbrojtjen e të dhënave sensitive të personave në rrezik./ Euronews - Syri.net