Shtetet e Bashkuara kanë fajësuar ushtrinë e Ruandës dhe grupin rebel M23 për bombardimin vdekjeprurës të një kampi refugjatësh në Republikën Demokratike të Kongos.

Të paktën nëntë persona, përfshirë shtatë fëmijë, u vranë në sulmin që u krye në kampin Mugunga në qytetin lindor të Goma të premten.

Ushtria kongoleze dhe M23 fajësuan njëra-tjetrën për sulmin.

Ruanda, e cila kufizohet me Republikën Demokratike të Kongon, akuzohet gjerësisht për mbështetjen e grupit rebel, të cilin ajo e mohon.

Departamenti Amerikan i Shtetit tha se sulmi i së premtes erdhi nga pozicionet e mbajtura nga Forcat e Mbrojtjes së Ruandës (RDF) dhe grupi M23.

Një zëdhënës tha se SHBA-ja ishte "shumë e shqetësuar për zgjerimin e fundit të Forcave të Mbrojtjes së Ruandës dhe të grupit M23" në RD Kongon lindore dhe u bëri thirrje të dyja palëve "të respektojnë të drejtat e njeriut dhe t'u përmbahen detyrimeve të zbatueshme sipas ligjit ndërkombëtar humanitar".

“Është thelbësore që të gjitha shtetet të respektojnë sovranitetin dhe integritetin territorial të njëri-tjetrit dhe të mbajnë përgjegjës të gjithë aktorët për abuzimet e të drejtave të njeriut në konfliktin në  Kongon lindore”, shtuan ata.

Imazhet që qarkulluan në mediat sociale treguan trupa të shtrirë në tokë në kamp të premten.

Shumica e banorëve kishin shkuar atje për t'i shpëtuar luftimeve në qytetet dhe fshatrat e tyre.

Nënkolonel Guillaume Njike Kaiko, një zëdhënës i ushtrisë së Kongos në rajon, tha se sulmi kishte ardhur si hakmarrje për sulmet e mëparshme kongoleze në pozicionet e ushtrisë ruandeze.

Presidenti Felix Tshisekedi, i cili ka kaluar disa javë jashtë vendit, do të kthehet në vendin e Afrikës Qendrore këtë fundjavë pas sulmit.

Rebelët dhe trupat qeveritare janë akuzuar të dyja muajt e fundit për abuzime kundër civilëve, ndërsa ata luftojnë për kontroll territorial.

Sulmi i fundit vjen disa ditë pasi luftëtarët M23 pretenduan se kishin pushtuar qytetin Rubaya - një zonë që është në zemër të minierave të koltanit që përdoret për prodhimin e telefonave celularë dhe baterive për automjetet elektrike.

Ndërkohë, një gjykatë ushtarake në Goma ka dënuar me vdekje tetë ushtarë të Republikës Demokratike të Kongos për "dezertim" dhe "burracakëri" gjatë luftimit të forcave rebele.

Grupi M23, i formuar si një degë e një grupi tjetër rebel, filloi të veprojë në vitin 2012 gjoja për të mbrojtur popullsinë etnike Tutsi në lindje të Kongos, e cila ishte ankuar prej kohësh për persekutim dhe diskriminim.

Ekspertët e OKB-së kanë thënë se grupi mbështetet nga Ruanda fqinje, e cila gjithashtu udhëhiqet nga Tutsis, diçka që Kigali e ka mohuar vazhdimisht.