Mbreti Charles III është diagnostikuar me kancer. Lajmin e bëri të ditur pallati ‘Buckingham’.
Sipas BBC, nuk është kancer prostate, por është zbuluar gjatë një trajtimi të fundit që po merrte mbreti anglez për prostatën e zmadhuar.
Tipi i kancerit nuk është zbuluar, por në një njoftim zyrtar thuhet se ai po merr trajtim të rregullt.
Pallati mbretëror thotë se: “Mbreti mbetet plotësisht pozitiv në lidhje me trajtimin e tij dhe pret që të kthehet në detyrën e plotë publike sa më shpejt të jetë e mundur”.
Ai do të shtyjë angazhimet e tij publike dhe pritet që anëtarë të tjerë të familjes mbretërore ta ndihmojnë dhe përkrahin gjatë trajtimit të tij.
Nuk jepen detaje të mëtejshme për fazën e kancerit apo ndonjë prognozë.
Mbreti 75-vjeçar u kthye në Londër të hënën në mëngjes dhe pallati thotë se ai ka filluar trajtimin si pacient i jashtëm.
Edhe pse do të pezullojë daljet e tij publike, Mbreti do të vazhdojë rolin e tij kushtetues si kreu i shtetit, duke përfshirë dokumentet dhe takimet private.
Një javë më parë, ai iu nënshtrua një ndërhyrje për prostatën në një spital privat në Londër.
Mbreti zgjodhi të bëjë publik trajtimin e tij për prostatën, me qëllimin që të inkurajojë sa më shumë njerëz të kontrollojnë prostatën.
© SYRI.net