Për herë të parë në Shqipëri, Forcat Speciale Shqiptare mblodhën njësitë më elitare të tetë Forcave Speciale nga rajoni i Ballkani Perëndimor, në poligonin kombëtar të Bizës në stërvitjen “Strong Balkan 23”.

Në kuadër të iniciativave të Shefave të Shtabit, Forcat e Armatosura Shqiptare planifikuan dhe organizuan në stërvitjen më të madhe me 220 forca speciale.

Për herë të parë në historinë e tyre 25 vjeçare, operatorët e forcave speciale shqiptare kryen infiltrim nga ajri me parashuta në 6000 metra lartësi duke u bërë kështu plotësisht operacionale e të ndërveprueshëm. Qëllimi i stërvitjes përmes skenarëve kompleks ishte për të rritur më shumë bashkëpunimin rajonal, por dhe nivelin profesional, aftësimin taktik, operacional e strategjik, për të përballuar sfidat komplekse që paraqet sot mjedisi i sigurisë.

NATO ka publikuar pamjet e stërvitjes që u zhvillua nga 31 tetori deri më 10 nëntor 2023. Në video përmendet edhe motoja e ROS: Më mirë të vdesim për diçka sesa të jetojmë pa bërë asgjë!

“Kjo krijon një ndjesi sigurie në rajonin e Ballkanit, ku forcat speciale stërviten së bashku duke sjellë paqe dhe siguri”,- shprehet komandanti i Regjimentit të Forcave Speciale nënkolonel Ajet Jata.

Si pjesë e stërvitjes, operatorët special nga vendet pjesëmarrëse dhe ato vëzhguese patën gjithashtu mundësinë të shpalosnin krenarinë e tyre kombëtare duke u hedhur me parashutë e duke valëvitur edhe flamujt e tyre kombëtarë teksa zbrisnin.