Një "koktej" i sëmundjeve të frymëmarrjes – gripi, virusi sincicial i frymëmarrjes (RSV) dhe një lloj i ri i COVID-19 - po qarkullojnë, mes shkallëve të ulëta të vaksinimit.

Vdekja e dy burrave në Itali nga gripi këtë javë ka bërë bujë në këtë vend pasi rastet e sëmundjeve të frymëmarrjes “po intensifikohen” në shtetet e tjera të BE-së.

Shumë vende evropiane janë në grahmat e një epidemie të gripit sezonal, me Italinë në veçanti, që po përballet me një nga stinët e saj më të këqija të gripit në vite.

Fabrizio Pregliasco, një profesor i asociuar i shëndetit në Universitetin e Milanos, tha për Euroneës Next se gripi zakonisht shkakton mijëra vdekje çdo vit në Itali pasi, si sëmundjet e tjera të frymëmarrjes, mund të përkeqësojë patologjitë kardiake dhe respiratore paraekzistuese ose të shkaktojë pneumoni virale.

Pregliasco tha se ky sezon i gripit ishte "më i keqi për sa i përket numrit të rasteve në vitet e fundit" dhe tha se lloji i gripit H1N1 në Itali përbën 60 për qind të izolimeve edhe në sistemin e mbikëqyrjes.

Ai tha se një "koktej" i sëmundjeve të frymëmarrjes – gripi, virusi sincicial i frymëmarrjes (RSV) dhe një lloj i ri i COVID19 - po qarkullonin, mes shkallëve të ulëta të vaksinimit.

Kjo u konfirmua nga ekspertët e Organizatës Botërore të Shëndetësisë (OBSH) të mërkurën, të cilët thanë se kishte një bashkëqarkullim të patogjenëve të shumtë në hemisferën veriore këtë vit.

“Kjo po shkakton një rritje të konsiderueshme të barrës dhe shtrimeve në spital jo vetëm për COVID-in, për gripin, por edhe nga këta patogjenë të tjerë”, tha Maria Van Kerkhove, drejtuesja teknike e OBSH-së për COVID-19.

"Ne kemi kërkesë dhe përdorim të ulët për vaksinat që janë në dispozicion; vaksinat për COVID dhe vaksinat për gripin shpëtojnë jetë, veçanërisht ndër ata që janë më të rrezikuar," shtoi ajo.

Qendra Evropiane për Parandalimin dhe Kontrollin e Sëmundjeve tha për Euroneës Next se virusi i gripit A(H1N1)pdm09 ishte me të vërtetë nëntipi "dominant" i gripit në Bashkimin Evropian.

Është një pasardhës i të ashtuquajturit lloji i "gripit të derrit" që shkaktoi pandeminë e vitit 2009 dhe është në shënjestër të vaksinës së këtij viti.

“Aktualisht nuk ka asnjë provë që infeksionet me gripin A(H1N1)pdm09 janë më të rënda këtë vit krahasuar me sezonet e kaluara. Fatkeqësisht, vdekjet nga gripi priten tani që sezoni i gripit ka filluar”, shtoi Qendra Evropiane për Parandalimin dhe Kontrollin e Sëmundjeve

Instituti i Lartë i Shëndetit i Italisë (ISS) shtoi të mërkurën se ndërsa rastet e reja të sëmundjeve të frymëmarrjes janë në nivelet e tyre "më të larta", ky kulm nuk paraqet ndonjë anomali dhe është në përputhje me nivelet e raportuara në vendet e tjera evropiane.

A po rriten rastet e gripit gjetkë nëpër Evropë?

Aktiviteti i gripit është intensifikuar në të gjithë Evropën që nga fundi i vitit 2023 me rritje në shumicën e vendeve të BE-së, sipas Raportit Evropian të Mbikëqyrjes së Virusit të Frymëmarrjes.

Gripi qarkullonte në nivele më të larta në Evropë sesa COVID-19 dhe RSV, virusi i frymëmarrjes që mund të shkaktojë bronkiolitin, javën e fundit të 2023.

Midis infeksioneve të rënda të frymëmarrjes, përhapja e gripit u rrit në më shumë se 10 për qind, i cili është "i krahasueshëm me vitet e mëparshme në fillimin e epidemisë sezonale", shtoi raporti.

“Epidemia e gripit ka filluar”, tha Instituti Robert Koch i Gjermanisë, i cili gjithashtu shtoi se rastet e gripit filluan të rriten në fund të vitit 2023.

“Vaksinimi i gripit mund të jetë ende i dobishëm edhe pasi të ketë filluar një epidemi gripi,” tha instituti. Ata shtuan se kishte një numër të lartë të rasteve të COVID-19, gripit dhe RSV në vend.

Shëndeti Publik në Francë tha në fillim të janarit se kishte një rritje të madhe të treguesve të gripit në të gjithë vendin, me një epidemi në 10 rajone dhe një "fazë para-epidemike" në tre rajone.

Të tre sëmundjet e frymëmarrjes,  COVID-19, RSV dhe gripi, vazhdojnë të qarkullojnë në nivele të larta, tha agjencia.

Spanja rifuti një detyrim për maskat në spitale këtë javë për shkak të rasteve në rritje dhe shtrimeve në spital për sëmundje të frymëmarrjes, përfshirë gripin që qarkullonte me "intensitet më të madh" se viruset e tjera.

Instituti i Shëndetit Publik të Italisë tha se javën e kaluar pati një incidencë të lartë të sëmundjeve të frymëmarrjes të ngjashme me gripin.

“Edhe pse është e pamundur të parashikohet saktësisht se kur do të arrijë kulmi i rasteve, një qarkullim i qëndrueshëm është i imagjinueshëm edhe në javët në vijim, i ndihmuar nga hapja e shkollave”, tha Anna Teresa Palamara, drejtoresha e departamentit të sëmundjeve infektive të institutit në një deklaratë.

Ajo rekomandoi, përveç vaksinimit, të jenë të kujdesshëm ndaj fëmijëve të vegjël dhe të moshuarve që janë në rrezik të sëmundjeve më të rënda të frymëmarrjes./ar.sh/SYRI.NET

​