Një zjarr shkatërroi një fabrikë për prodhimin e armaturës për trupat e presidentit rus Vladimir Putin pranë Moskës në orët e hershme të mëngjesit.

Pronari i fabrikës së lartpërmendur, “Gavari Group”, është nën sanksionet e Ukrainës për shkak të luftës, shkruan Daily Mail .

Institucionet kompetente në Rusi po hetojnë nëse zjarri i mëngjesit të sotëm është shkaktuar nga zjarrvënia në një akt sabotimi. Nuk pati raportime për dronë që synonin fabrikën në Obukhov, Oblast i Moskës, dhe zjarri thuhet se shkatërroi rreth 86,000 metra katrorë të punishtes dhe magazinës, dhe më shumë se 100 zjarrfikës u dërguan në vendngjarje.

Fabrika thuhet se prodhon produkte të shumta, por çelësi është prodhimi i jelekëve antiplumb, helmetave dhe këpucëve mbrojtëse. Kjo është arsyeja pse Kievi e sanksionoi fabrikën.

Nga zjarri nuk pati viktima dhe punëtorët e fabrikës shpëtuan para se zjarri të përfshijë ndërtesën.

Shpërthimet dhe zjarret në objektet strategjike duke përfshirë objektet e mbrojtjes, objektet e depozitimit të naftës dhe tubacionet e gazit janë bërë të shpeshta gjatë luftës gati 23-mujore.

Kjo ngjarje fatkeqe erdhi pas një sulmi rus në një hotel në Kharkiv, në verilindje të Ukrainës, ku mbetën të plagosur 11 persona.

Dy raketa goditën një hotel në qendër të Kharkiv. Aty nuk kishte personel ushtarak. Në vend të kësaj, ishin 30 civilë, njëmbëdhjetë prej të cilëve u plagosën”, njoftoi kryebashkiaku Igor Terekhov në Telegram dhe shtoi se njëri nga të plagosurit ishte në “gjendje shumë të rëndë” dhe se “gazetarët turq ishin në mesin e viktimave”. 19 persona u evakuuan.

Disa ndërtesa të tjera, duke përfshirë dy blloqe apartamentesh, u raportuan gjithashtu të dëmtuara në sulmin e fundit.

 “Përveç hotelit, janë prekur edhe ndërtesa banimi – një komunale, një private, një shitës makinash dhe një kompani”, tha kryetari i bashkisë.

Kreu i Administratës Ushtarake Rajonale të Kharkiv, Oleg Sinegubov, tha se dy raketa ruse S-300 goditën hotelin rreth orës 22:30.

Hoteli ndodhet rreth 30 kilometra nga kufiri rus.

Përtej kufirit, Ministria e Mbrojtjes e Rusisë tha se ka kapur tre drone ukrainas rreth orës 4:30 të mëngjesit të së enjtes mbi rajonet Tula, Kaluga dhe Rostov.

Guvernatori i rajonit të Voronezhit, Alexander Gusev, bëri të ditur gjithashtu se një dron ukrainas goditi "çatinë e një ndërtese" gjatë natës, por se nuk pati dëme.