Kisha Katolike duhet “të shqyrtojë seriozisht” mundësinë e lejimit të martesave për priftërinjve, tha një zyrtar i lartë i Vatikanit dhe këshilltar i Papa Françeskut në një intervistë të publikuar sot.

“Kjo është ndoshta hera e parë që po e them publikisht dhe mund të duket e gabuar për disa njerëz,” tha për Times of Malta, Kryepeshkopi Charles Scicluna, i cili është gjithashtu sekretar ndihmës në zyrën doktrinore të Vatikanit.

Papa Françesku ka përjashtuar çdo mundësi që ai të ndryshojë rregullin katolik romak që kërkon që priftërinjtë të jenë të pamartuar. Megjithatë kjo nuk është një doktrinë formale e Kishës dhe kështu mund të ndryshohet nga një papë i ardhshëm.

Scicluna theksoi se priftërinjtë lejoheshin të martoheshin në mijëvjeçarin e parë të historisë së Kishës dhe se martesa lejohet sot në ritin lindor të Kishës Katolike.