Në Tel Aviv të Izraelit u mblodhën mijëra njerëz për të protestuar dhe shprehur pakënaqësitë e tyre kundër qeverisë izraelite dhe kryeministrit Benjamin Netanyahu.

Protesta e tyre u përcoll me këngë dhe thirrje për kthimin e pengjeve në shtëpi.

Në tubim morën pjesë shumë njerëz që kishin humbur familjarë gjatë kësaj periudhe, dhe dhimbjen e tyre zgjodhën ta ndajnë me turmën.

Fjalim mbajti edhe oficeri ushtarak Lior Sela, i cili theksoi se do të padisë “përgjegjësit e këtij dështimi të madh”, raporton euronews.

Ndërkohë, fuqitë botërore kërkojnë që të lejohet ndihma në territorin palestinez, pasi tensionet midis Izraelit dhe Hamasit vijnë e shtohen.

Sipas shifrave të OKB-së, 1.9 milion banorë janë detyruar të zhvendosen nga Gaza, ku shumë prej tyre janë dërguar në strehimore dhe tenda të mbushura me njerëz, duke luftuar për ushqim, ujë, dhe kujdes mjekësor.Lufta midis Hamasit dhe Izraelit filloi pas sulmit të 7 tetorit nga grupi militant, i cili vetëm atë natë vrau 1200 njerëz dhe mori 240 pengje.

Deri më tani, thuhet se janë vrarë më shumë se 20 mijë palestinezë, dhe 53 mijë janë plagosur.

Por, pavarësisht thirrjeve ndërkombëtare për armëpushim, Izraeli është zotuar të vazhdojë luftën derisa Hamasi të shkatërrohet dhe të hiqet nga pushteti.