Familje të tëra janë zhdukur nga sulmet ajrore të Izraelit në rrugët me popullsi të dendur të Gazës, ku shumë palestinezë jetojnë në shtëpi me shumë breza.

Tre palestinezë në Mbretërinë e Bashkuar i thanë BBC-së se më shumë se 20 të afërm të tyre ishin vrarë me një goditje - dhe shumë ishin ende të ngecur nën rrënoja.

Ishte vetëm një pasdite e së premtes dhe me diell katër vjet më parë kur Ahmed al-Naouq shkrepi këtë fotografi me familjen e tij. Por ai e mban mend mirë, sidomos tani.

Nën hijen e ullinjve pranë shtëpisë së babait të tij, motrat dhe vëllezërit e tij u mblodhën bashkë me fëmijët e tyre për të ngrënë, për të luajtur dhe për të biseduar.

Duke bërë një pushim nga vrapi, fëmijët ishin gati për të ngrënë kur Ahmedi i kapi në fotografi të gjithë së bashku. Tani, shumica prej tyre kanë vdekur, thotë ai.

Ata u vranë nga një sulm ajror që goditi shtëpinë e familjes më 22 tetor. Në total, 21 persona u vranë duke përfshirë babanë e tij, tri motrat, dy vëllezërit dhe 14 fëmijët e tyre.

Më shumë se 11,000 palestinezë janë vrarë në bombardimet izraelite, sipas ministrisë së shëndetësisë të Hamasit të Gazës. Sulmet ajrore filluan pas sulmit të 7 tetorit nga Hamasi, në të cilin Izraeli thotë se rreth 1200 njerëz u vranë dhe më shumë se 200 u morën peng.

Izraeli thotë se strategjia e tij në Gaza ka qenë të çrrënjosë Hamasin, të cilin e akuzon se vepron në zemër të komuniteteve civile - dhe se ndërmerr hapa për të zbutur viktimat civile.

Në foton e Ahmedit shfaqen vetëm shtatë nga fëmijët e vrarë. Disa nuk ishin aty atë ditë, disa as nuk kishin lindur.

Si shumë palestinezë, vëllezërit e Ahmed ndërtuan shtëpitë e tyre familjare mbi ato të babait të tyre - një traditë që do të thotë se brezat po zhduken me një goditje.