Personi i dytë në komandën e Hezbollahut, milicisë së fuqishme të mbështetur nga Irani në Liban, thotë se vrasja e civilëve nga Izraeli në Gaza rrezikon të shkaktojë një luftë më të gjerë në Lindjen e Mesme.

Duke folur nga Bejruti, sheiku Naim Qassem i tha gazetares Orla Guerin të BBC se "zhvillime shumë serioze dhe shumë të rrezikshme mund të ndodhin në rajon dhe askush nuk do të jetë në gjendje t'i ndalojë pasojat".

"Rreziku është real," tha ai, "sepse Izraeli po e shtont agresionin e tij kundër civilëve dhe po vret më shumë gra dhe fëmijë. A është e mundur që kjo të vazhdojë dhe të rritet, pa sjellë rrezik real për rajonin? Unë mendoj se jo."

Ai këmbënguli se çdo përshkallëzim do të lidhej me veprimet e Izraelit. “Çdo mundësi ka një përgjigje”, tha ai.

Hezbollahu, "Partia e Zotit" ka shumë mundësi.

Grupi islamik shiit - i klasifikuar si një organizatë terroriste nga Britania e Madhe, SHBA dhe Liga Arabe - është forca më e madhe politike dhe ushtarake në Liban.

Deri më tani, përgjigja e saj ndaj luftës në Gaza ka përfshirë përforcimin e paralajmërimeve të saj, por kalibrimin e kujdesshëm të veprimeve të saj.

Kur një sulm izraelit vrau një grua dhe tre fëmijë në Libanin jugor të dielën, Hezbollahu përdori raketat Grad për herë të parë në konflikt, duke vrarë një civil izraelit.

Udhëheqësi i Hezbollahut, Hassan Nasrallah, ka kërcënuar se çdo vdekje civile në Liban do të korrë një tjetër përtej kufirit. Por veçanërisht, ai nuk e ka kërcënuar Izraelin me luftë të gjithanshme

Ndërsa këmbëngul se "të gjitha opsionet janë në tryezë", grupi militant është kufizuar në sulme ndërkufitare, duke goditur kryesisht objektiva ushtarake. Më shumë se 60 luftëtarë të tij janë vrarë, por ai ka shumë e më shumë mbështetës të ashpërsuar nga beteja për t'i zëvendësuar ata. Një luftëtar i varrosur në Bejrut këtë javë ishte anëtari i pestë i familjes së tij që vdiq për Hezbollahun, ndër breza.

Gjatë gjithë intervistës sonë, nënkryetari i organizatës u përpoq të portretizonte Hezbollahun si një organizatë mbrojtëse - megjithëse është e angazhuar për shkatërrimin e Izraelit dhe ndezi një luftë me Izraelin në 2006 duke rrëmbyer dy nga ushtarët e tij në një bastisje ndërkufitare.

Sheiku Qassem pretendoi se Izraeli "e inicoi agresionin kundër Gazës në një mënyrë të shëmtuar".

Kur BBC vuri në dukje se ishte Hamasi ai që kishte sulmuar Izraelin më 7 tetor, ai i mbrojti sulmet si një përgjigje e pashmangshme ndaj pushtimit izraelit të tokave palestineze.

Ai përsëriti pretendimin e pabazë se forcat izraelite, jo Hamasi, vranë shumë civilë izraelitë. “Por çfarë mund të thuhet për pamjet e kamerave të helmetave, të veshura nga vetë militantët e Hamasit - që i tregojnë ata duke u zbavitur tek vrasin?”

Ai e hodhi poshtë pyetjen. “Pse nuk shikojmë se çfarë ka bërë Izraeli brenda Gazës”, tha ai. “Ata vrasin civilë dhe shkatërrojnë shtëpi”./ar.sh/SYRI.NET