Ministri i Ekonomisë Sergio Massa e mundi çuditërisht populistin ekscentrik të ekstremit të djathtë Javier Milei në raundin e parë të zgjedhjeve presidenciale të Argjentinës.

Kundër të gjitha gjasave dhe në kundërshtim me sondazhet e opinionit, Ministri i Ekonomisë Sergio Massa fitoi raundin e parë të zgjedhjeve presidenciale të Argjentinës të dielën.

Me 36.6% të votave, ai mundi rivalin e tij të së djathtës ekstreme, Javier Milei (30%), një ekonomist eksentrik që ka pasur një ngritje meteorike në vetëm dy vjet që nga hyrja e tij në arenën politike.

Fitorja e ministrit Massa kundër Javier Milei erdhi pavarësisht faktit se këtë mandat inflacioni është rritur në tre shifra, duke gërryer fuqinë blerëse të pagave dhe duke rritur varfërinë.

Gjatë fushatës së tij pati: 140% inflacion, 40% të varfër dhe një bankë qendrore me rezerva alarmante. Megjithatë ai nuk u ndëshkua në votimin e së dielës.

Të dy do të shkojnë në balotazh më 19 nëntor.

Shumica e sondazheve parazgjedhore, të cilat janë tejet të pabesueshme, i dhanë Javiert Milei një epërsi të lehtë ndaj ministrit Massa.

Kurse ish-ministrja e Sigurisë Patricia Bullrich e koalicionit kryesor të opozitës së qendrës së djathtë doli e treta në fushën e pesë kandidatëve me 23.8%.

Ministri Massa ka qenë një figurë udhëheqëse në qeverinë e qendrës së majtë, e cila ka qenë në pushtet që nga viti 2019.

Ai e përqendroi me sukses mesazhin e tij se si propozimet e Milei-t për të reduktuar madhësinë e shtetit - nga përgjysmimi i numrit të ministrive qeveritare deri te shkurtimet e thella të shpenzimeve - do të ndikonin në jetën e përditshme të argjentinasve, shpjegoi për AP, Mariel Fornoni, nga konsulenca politike Management & Fit. Kjo “pati një ndikim të rëndësishëm dhe padyshim që ngjallte më shumë frikë se çdo gjë tjetër”, thotë Fornoni.

Zëri i frikës ishte më i fortë se premtimet e Milei.

Milei dhe Massa janë diametralisht të kundërta përsa i përket filozofive të tyre politike.

I pari është një anarko-kapitalist i vetëquajtur që admiron ish-presidentin e SHBA-së, Donald Trump, ai ndërtoi një bazë mbështetjeje duke bërë thirrje për shfuqizimin e Bankës Qendrore, zëvendësimin e monedhës vendase me dollarin amerikan dhe një spastrim të institucionit të korruptuar, të cilën ai e quajti "kastë politike".

I dyti është jurist, Ministër i Ekonomisë që prej korrikut 2022 dhe si të gjithë peronistët, pragmatist në aspektin politik dhe ekonomik, por besimtar në nevojën e një "shteti aktual" për të rregulluar dhe garantuar atë që tregu nuk bën vetvetiu.

Në ditët para zgjedhjeve, në rrugët e Argjentinës kishte një ndjenjë ankthi.

Njerëzit me të ardhura të disponueshme blenë mallra në pritje të një zhvlerësimi të mundshëm të monedhës, duke u kujtuar se qeveria e kishte zhvlerësuar peson me pothuajse 20% një ditë pas zgjedhjeve paraprake të gushtit.

Argjentinasit blenë gjithashtu dollarë dhe tërhoqën depozitat në valutë të fortë nga bankat pasi pesoja e përshpejtoi nënçmimin e saj tashmë të qëndrueshëm.

Si Massa ashtu edhe Milei ngrenë shumë dyshime serioze midis ekonomistëve, sepse pikënisja për këdo që merr presidencën më 10 dhjetor është një skenar shumë kompleks që përcakton qëndrueshmërinë dhe suksesin e çdo programi ekonomik.

Përveç inercisë së lartë inflacioniste, Argjentina ka një defiçit fiskal, nuk ka akses në tregjet ndërkombëtare të financimit dhe aktualisht i mungojnë rezervat valutore të mjaftueshme për të shmangur tërmetet e përsëritura të kursit të këmbimit dhe për të mbajtur në punë makinerinë prodhuese.

​