Komandanti në hije që fshihet pas sulmit të Hamasit ndaj Izraelit të shtunën është një figurë e errët. Mohammed Deif, komandanti i krahut ushtarak të grupit militant , njihet si “Mysafiri”, ose ndonjëherë “macja me nëntë jetë”, shkruan SkyNews.

Pseudonimi i parë është marrë nga emri i tij – Deif do të thotë mysafir në arabisht – duke iu referuar zakonit të tij për të qëndruar me simpatizantë të ndryshëm çdo natë për të shmangur zbulimin.

E dyta është një referencë për aftësinë e tij për shmangien e tentativave izraelite për vrasje.

Një paraqitje e rrallë publike

Zëri në regjistrim ishte i qetë dhe preciz, po jepej një mesazh tmerri. “Në dritën e krimeve të vazhdueshme kundër popullit tonë, në dritën e orgjisë së okupimit dhe mohimit të ligjeve dhe rezolutave ndërkombëtare dhe në dritën e mbështetjes amerikane dhe perëndimore, kemi vendosur t’i japim fund gjithë kësaj”, kishte thënë folësi, i filmuar në hije, në mënyrë që armiku ta kuptojë se më nuk mundet të ikë pa u mbajtur përgjegjës.

Zëri i dëgjuar në audion e regjistruar, të publikuar disa orë pas sulmit të së shtunës në Izrael, supozohet se i përket Mohammed Deifit, komandantit të krahut ushtarak të grupit militant palestinez, Hamas dhe organizatorit të agresionit ndaj Izraelit.

Komandanti i pakapshëm ushtarak i Hamasit

Deif iu bashkua Hamasit rreth vitit 1990 dhe mësoi aftësinë e prodhimit të bombave nën drejtimin e Yehya Ayyash, një prodhues bombash i njohur si “inxhinieri”.

Ai u akuzua për organizimin e një sërë sulmesh vetëvrasëse nga viti 1995 e tutje dhe u konsiderua personalisht përgjegjës për vdekjen e dhjetëra izraelitëve.

Ai u vlerësua gjithashtu si arkitekti i një rrjeti të sofistikuar tunelesh nën Rripin e Gazës dhe projektimi i raketës Qassam.

Një burim i Hamasit, i cili e njeh Deifin që nga vitet 1990, tha për Reuters se Deif ka qenë në qendër të zhvillimeve brenda krahut të armatosur që nga viti 1994.

Në vitin 2002, ai u bë kreu i Brigadave Qassam – dega ushtarake e Hamasit – pasi Izraeli vrau ish-liderin e tij.

Profili i ulët i Deif është arsyeja e suksesit të tij, sipas një ish-lideri të lartë të Hamasit, i cili foli për Ëashington Post në 2014.

Nuk ka pothuajse asnjë foto të Deifit në publik, dëshmi e natyrës së tij të fshehtë.

“Ai mban një profil të ulët dhe jeton i fshehur mes popullatës. Ai lëviz me pasaporta të ndryshme dhe identitete të ndryshme,” tha Imad Falouji.

“Ai është i suksesshëm deri më tani, sepse rrethi tij është shumë i vogël. Kjo është arsyeja pse ai është ende gjallë.”

Falouji tha për gazetën se Deif u perceptua nga palestinezët si me këmbë në tokë dhe qëndrimi i tij i vijës së ashpër ndaj Izraelit shihej si një pasqyrim i saktë i interesave të palestinezëve.

‘Macja me nëntë jetë’

Deif ka qenë njeriu më i kërkuar i Izraelit që nga viti 1995 dhe i ka mbijetuar tentativave të shumta për vrasjen e tij.

Por ai nuk shpëtoi i padëmtuar. Ai është pjesërisht i paralizuar dhe thuhet se përdor një karrige me rrota.

Ai gjithashtu thuhet se humbi një sy dhe një krah në një nga sulmet.

Një sulm ajror izraelit që kishte si objektiv Deif në vitin 2014 la të vdekur gruan dhe dy fëmijët e tij.

Deif është renditur si një Terrorist Global i Përcaktuar Speciale nga Departamenti i Shtetit i SHBA.

i lindi në kampin e refugjatëve Khan Younis në vitet 1960. Ndërsa dihet shumë pak për edukimin e tij.

Ai vazhdoi të studionte shkencën në Universitetin Islamik të Gazës, ku ishte pjesë e një grupi teatror.

Deif vazhdoi të aktrojë pasi iu bashkua Hamasit, ndonjëherë duke luajtur pjesë në video propagandistike, tha për Washington Post Avi Melamed, një ekspert i Lindjes së Mesme në Institutin Eisenhower.

Hera e fundit që zëri i tij u dëgjua ishte në vitin 2021, kur ai paralajmëroi se Izraeli do të paguante një “çmim të rëndë” nëse nuk plotësonte kërkesat e Hamasit për Jerusalemin.

Në 11 ditët e konfliktit që pasuan, të paktën 250 njerëz u vranë në Gaza dhe 13 në Izrael.

Para kësaj, ai nuk kishte asnjë lajm për shtatë vjet.