“Është thellësisht për të ardhur keq që në një festival kaq të rëndësishëm, ekziston mundësia e përdorimit të fuqisë së artit për të propaganduar, propagandën e organizatës terroriste FETÖ nën pretekstin e viktimizimit”.

Festivali më i vjetër i filmit në Turqi, Festivali i Filmit Portokalli i Artë në Antalia është përfshirë në trazira pasi anëtarët e jurisë dhanë dorëheqjen dhe kineastët i tërhoqën krijimet nga konkursi me akuzat për censurë.

Në një lëvizje të paprecedentë, producentët dhe regjisorët e 27 filmave në Festivalin e Filmit në Antalia “Golden Orange” njoftuan të mërkurën se po tërhiqeshin, disa ditë pasi 20 anëtarë të jurisë së festivalit dhanë dorëheqjen për heqjen e një dokumentari nga organizatorët.

“Kanun Hükmü” (Dekreti) nga Nejla Demirci fokusohet në dy punonjës publikë, një mësues dhe mjek, të cilët u pushuan nga puna nën gjendjen e jashtëzakonshme të vendosur në Turqi pas një tentative për grusht shteti në vitin 2016.

Qeveria e Partisë për Drejtësi dhe Zhvillim (AKP) të Turqisë nisi një spastrim masiv të institucioneve shtetërore pas një përpjekjeje për grusht shteti më 15 korrik 2016. Më shumë se 130,000 nëpunës civilë u pushuan nga puna përmes dekreteve emergjente. Autoritetet thanë se ata e humbën punën e tyre për shkak të lidhjeve të dyshuara me "organizatat terroriste", por kritikët kanë pretenduar se ishte një goditje e përgjithshme kundër kujtdo që shihej si kundërshtar nga qeveria.

Drejtori i festivalit Ahmet Boyacıoğlu tha se dokumentari ishte hequr nga kategoria e filmit dokumentar kombëtar për shkak të procedurave ligjore në vazhdim kundër njërit prej personave të paraqitur.

“Për këtë arsye është vendosur që filmi të përjashtohet nga përzgjedhja e këtij viti për të mos cenuar procesin gjyqësor dhe paanshmërinë”, tha ai.

Megjithatë, Demirci tha se ky ishte një “arsyetim” dhe “censurë e plotë”.