U desh një pistoletë e mbushur, e drejtuar në kokën e Lazzaro D'Auria, që pronari italian i tokës t'i thoshte më në fund po, mafies më të re dhe më të dhunshme të vendit.

Fermeri nga Pulia u kishte rezistuar përpjekjeve të tyre për zhvatje në të kaluarën -- kërcënimeve, zjarreve, dëmtimit të të korrave dhe pronës së tij.

Por i befasuar nga vizita herët në mëngjes e një duzine burrash, duke përfshirë një bos me armë, ai ra dakord me kërkesën e tyre për të paguar 150,000 euro në vit.

Në vend që t’i paguante të nesërmen, D'Auria shkoi në polici, duke e bërë atë një nga të paktët njerëz që denoncoi mafian pak të njohur të Foggias, organizatën e krimit të organizuar të Italisë të injoruar prej kohësh  dhe sot më të dhunshmen e saj.

"Nëse më shumë qytetarë do të ngrinin akuza, mafia vendore mund të dobësohej," i tha AFP, zoti D'Auria, i cili jeton nën mbrojtjen e policisë që nga viti 2017.

“Qytetarë, flisni!” lutet 57-vjeçari, i cili i sheh goditjet e fundit nga autoritetet si një shenjë se mafia mund të dobësohet nëse qytetarët kapërcejnë frikën e tyre.

Luftërat e përgjakshme të klaneve të saj u konsideruan dikur si grindje fermerësh, por e ashtuquajtura "Mafia e Katërt" - pas Cosa Nostra të Siçilisë, 'Ndrangheta të Kalabrisë dhe  Camorra të Napolit -- më në fund po ndez këmbanat e alarmit brenda shtetit italian.

Por ka ardhur vonë. Mafia më e re e Italisë tashmë e ka mbytur provincën e madhe juglindore, duke mbushur arkat e saj dhe duke çimentuar kontrollin e saj përmes trafikut të drogës, zhvatjes, grabitjeve të armatosura dhe vjedhjes së automjeteve dhe bagëtive për shpërblim.

"Është një mafie rudimentare, primitive. Shumë e dhunshme, shumë agresive," tha Ludovico Vaccaro, prokurori publik i Foggia.

Ndërsa mafiet e tjera kryesore janë diplomuar në aktivitete më pak të dukshme, më fitimprurëse, duke përfshirë infiltrimin në ekonominë legjitime, mafia e Foggia është ende në një fazë fillestare.

“Sot mafiozët kanë evoluar, ndaj qëllojnë më pak, duke kërkuar një strategji heshtjeje për të qëndruar pa u vënë re”, tha Vaccaro.

“Ndërsa kjo është ende një mafi që, për të treguar fuqinë e saj mbi territorin, qëllon dhe vret”.

Provinca e Foggia ka shkallën e tretë më të lartë të vrasjeve në Itali dhe pesë nga 16 vrasjet vitin e kaluar ishin të lidhura me mafien.

“Batalionet” me bazë familjare nga zona të ndryshme shpesh bashkëpunojnë, duke ndarë paratë e zhvatjes që paguajnë bashkëpunëtorët dhe të burgosurit.

“Kur ndonjëherë lindin konflikte për ndarjen e të ardhurave të paligjshme, ka grindje dhe batalionet përleshen dhe fillojnë të vrasin njëri-tjetrin”, tha zëvendës shefi i policisë Mario Grassia.

Secili grup ka specialitetin e tij, nga grabitjet e armatosura të stilit ushtarak të kamionëve të mallrave në Cerignola deri te taktikat e shkollës së vjetër të përdorura në qytetin e Foggia-s, ku bombat e natës në vitrina dhe makina i bindin dyqanxhinjtë hezitues të paguajnë.

Fermerët në San Severo si D'Auria shpesh gjejnë pemët e tyre të ullirit të prera, të korrat e tyre të djegura ose traktorët ose bagëtinë e vjedhur.

Në Gargano, bregdeti spektakolar i të cilit mirëpret turistët si dhe dërgesat shqiptare të drogës, mafia është veçanërisht e dhunshme.

Katër vjet më parë, një kafkë njeriu u la jashtë një ndërtese komunale për kryebashkiakun e Monte Sant'Angelo. Koka e rrjepur e një dhie me një kamë i është lënë në të njëjtin vit avokatit të nënës së një viktime të zhdukur nga mafia.

Karta e mafies Gargano, thonë autoritetet, është të qëlluarit e viktimave në fytyrë ose hedhja e tyre në shpella.

"Është e lehtë të fshehësh gjërat. Herë pas here gjejmë diçka të rëndë, makina të vjedhura, trupa të njerëzve të zhdukur," tha prokurori Vaccaro.