Nuk ka informacion për ngjarjen, njoftoi Organizata Kombëtare e Shëndetit Publik dhe spitali

Greqi - Një rast i hepatitit tek një foshnjë mësohet se është zbuluar në Heraklion të Kretës, ndërsa po hetohet nëse ka lidhje me raste të tjera të sëmundjeve inflamatore të mëlçisë që janë raportuar në mbarë botën.

Bëhet fjalë për një djalë 14-muajsh, i cili gjithashtu ishte infektuar me koronavirus disa muaj më parë, sipas informacioneve të Cretapost, diçka që nuk e konfirmojnë institucionet shëndetësore greke, as EODY dhe as PAGNI/Venizelio.

Cila është gjendja e tij shëndetësore?

Sipas informacioneve të mediave të Kretës, pak ditë më parë fëmija i vogël ka shfaqur simptoma të hepatitit, për pasojë prindërit e kanë dërguar për ekzaminim tek pediatri. Ekzaminimet thuhet se treguan një rritje të mprehtë të transaminazave të tij, por janë ende nën pragun e gatishmërisë dhe shtrimit në spital.

Sipas informacioneve të Cretapost, shkencëtarët të cilët janë informuar për gjendjen e tij kanë rekomanduar monitorim të vazhdueshëm. Në rast se transaminazat arrijnë ose kalojnë kufirin prej 500, atëherë fëmija duhet të shtrohet në një Repart të Infeksionit Special.

Tashmë kanë nisur procedurat për të përcaktuar nëse ky rast konsiderohet përfundimisht i dyshimtë në lidhje me hepatitin akut që mbizotëron te fëmijët britanikë.

Spitali dhe EODY nuk e konfirmojnë informacionin

Informacionet thonë se deri tani si nga spitali ashtu edhe nga Organizata Kombëtare e Shëndetit Publik (EODY) nuk konfirmohet incidenti.

Siç raporton “Proto Thema” nga EODY, bëhet me dije se nuk ka asnjë informacion për ndonjë incident të tillë në spitalet e Kretës. Nuk përjashtohet mundësia që djali të monitorohet nga një pediatër privat, i cili nuk duket të ketë informuar autoritetet zyrtare shëndetësore të Qarkut.

Rastet e dyshuara të hepatitit akut në një spital në Kretë nuk janë konfirmuar, thanë për ERT administratorët e Spitalit Universitar të Heraklionit, Chalkiadakis Giorgos dhe Spitalit Venizelio,Terzakis Konstantinos.

Por lajmi i transmetuar nga Cretapost.gr është edhe përgënjeshtruar kategorikisht në ERT Heraklion nga shefja e RAE, Lena Borboudaki.