Pekin - Sekretari amerikan i Shtetit, Antony Blinken u takua të premten me presidentin kinez Xi Jinping dhe zyrtarë të lartë kinezë, duke theksuar rëndësinë e "menaxhimit me përgjegjësi" të dallimeve midis Shteteve të Bashkuara dhe Kinës, teksa të dy palët përplaseën për një numër mosmarrëveshjesh, çështjesh dypalëshe, rajonale dhe globale.

Bisedimet mes dy palëve janë shtuar muajt e fundit, edhe pse dallimet janë rritur. Blinken tha se ai ngriti shqetësimin te Xi për mbështetjen e Kinës ndaj Rusisë dhe pushtimin e Ukrainës si dhe çështje të tjera duke përfshirë Tajvanin dhe Detin e Kinës Jugore, të drejtat e njeriut dhe prodhimin dhe eksportin e prekursorëve sintetikë të opioideve.

Blinken dha një notë pozitive për përparimin e bërë kohët e fundit në bashkëpunimin dypalësh, duke përfshirë komunikimet ushtarake, kundër narkotikëve dhe inteligjencës artificiale, për të cilat të dyja palët ranë dakord të fillojnë një dialog se si të zvogëlohen rreziqet nga teknologjia me zhvillim të shpejtë.

Xi: Konkurrenca duhet të jetë rreth progresit të përbashkët 

Televizioni  kombëtar kinez CCTV ka publikuar më shumë komente që presidenti Xi Jinping thuhet se i ka dhënë Blinken gjatë takimit të tyre sot në Pekin.

Sipas CCTV, Xi tha se Kina "nuk kishte frikë nga konkurrenca, por konkurrenca duhet të jetë për përparimin e përbashkët, jo një lojë me shumën zero".

Ai tha se vendi i tij ishte "i lumtur që pa Shtete të Bashkuara të sigurta, të hapura, të begata dhe në zhvillim dhe shpreson që Shtetet e Bashkuara të kenë gjithashtu një pikëpamje pozitive për zhvillimin e Kinës".

Ai shtoi se të dy fuqitë duhet "të marrin përgjegjësinë për paqen botërore, të krijojnë mundësi për zhvillim për të gjitha vendet, të ofrojnë të mira publike për botën dhe të luajnë një rol pozitiv në unitetin botëror".

Në foto: Diplomatët e lartë takohen në Pekin

Siç kemi raportuar, gjatë bisedimeve të gjera, të dy palët adresuan kërkesat e SHBA-së që Kina të frenojë tregtinë globale të fentanilit dhe për tensionet në rritje mbi territorin e diskutueshëm në Detin e Kinës Jugore.

Këtu janë disa nga fotot që tregojnë takimet e sotme në Pekin: