Presidenti amerikan, Donald Trump, është zotuar të bëjë ndryshime “radikale” ndaj praktikave për ndihmat duke pezulluar ato qeveritare ndaj vendeve që lejojnë futjen e individëve me të kaluar kriminale në Shtetet e Bashkuara.

Presidenti Trump foli gjatë një takimi në Nju Jork, një shtet që po lufton bandat kriminale. Zyrtarët e Nju Jorkut e njohën presidentin me përparimet e bëra në shpërbërjen e bandës së dhunshme “Mara Salvatrucha” që njihet edhe si “MS-13”.

Grupi “MS-13” filloi në vitet 80-të në Los Angeles nga emigrantët nga El Salvadori. Banda është zgjeruar me përfshirjen e hondurasve, guatemalasve, meksikanëve dhe shtetasve nga vende të tjera të Amerikës Qendrore dhe Jugore. Motoja e bandës është “vrit, përdhuno dhe kontrollo”.

“I kam quajtur kafshë dhe më qortuan. Ata thanë se janë njerëz. Ata nuk janë njerëz, janë kafshë”, tha Presidenti Trump.

Presidenti e ka bërë ndër prioritetet kryesore eliminimin e bandës “MS-13”. Ai vlerësoi Agjencinë e Imigracionit për burgosjen dhe dëbimin e mijëra pjesëtarëve të bandës. Një zyrtar i lartë i agjencisë tha se 4,800 pjesëtarë të bandës, përfshi qindra udhëheqës dhe bashkëpunëtorë të “MS-13”, u arrestuan një vit më parë në të gjithë vendin. Thomas Homan është drejtor në detyrë i Agjencisë për Imigracionin dhe Doganat.

“Duam ta shtrijmë goditjen drejt jugut, po godasim MS-13 atje ku është komanda dhe kontolli në El Salvador. Zyrat tona në Amerikën Qendrore po punojnë ngushtë me organet e rendit dhe të drejtësisë në El Salvador. Kemi arrestuar dhe larguar qindra pjesëtarë të MS-13 nga rrugët e El Salvadorit.”

Presidenti Trump tha se vendet që lejojnë kriminelët e tyre të futen në Shtetet e Bashkuara do të penalizohen.

“Do të ndërtojmë një sistem ku sa herë dikush vjen nga një vend i caktuar, atij vendi do t’i shkurtojmë një sasi të madhe parash nga ndihmat që ne japim, nëse u japim ndonjë ndihmë. Pavarësisht raporteve që dëgjoj, mendoj se këto vende nuk po na ndihmojnë.”