Nuk mungon vetëm Lionel Messi, që dje mbushi 30 vjeç, por dhe Cristiano Ronaldo, dy vjet më i madh se argjentinasi, nuk bën pjesë në podiumin e futbollistëve më të shtrenjtë të planetit, bazuar te vlera e tyre aktuale në merkato, sipas CIES, (Qendra Ndërkombëtare e Kërkimeve Sportive).

Sulmuesi brazilian i Barcelonës, 25-vjeçari Neymar, është futbollisti më i shtrenjtë i planetit, me vlerë 210.7 milionë euro.

Pas tij renditen dy lojtarë të Tottenham, Dele Alli (155.1 milion euro) dhe Harry Kane (153.6 milion euro), vetëm i katërti është Lionel Messi, që kushton 151.7 milionë euro.

Në vendin e pestë të lojtarëve më të shtrenjtë të planetit është Antoine Griezmann i Atletico Madrid dhe më pas vijnë me radhë Luis Suarez, Paul Pogba, dhe Gonzalo Higuain, i vlerësuar nga CIED 120.2 milionë euro.

Dhjetë vendet e para kompletohen me Eden Hazard të Chelsea dhe Paulo Dybala të Juventus, ndërsa vetëm i 11-i është Cristiano Ronaldo, i cili ka fituar katër herë “Topin e Artë” dhe është kandidati kryesor për t’u shpallur më i miri edhe në fund të këtij viti. Ndërkohë futbollisti italian më i shtrenjtë është Insigne, në vendin e 32-të, me vlerë rreth 80 milionë euro.