Lautaro Martinez hap zemrën: Jam i trishtuar, s’kam folur për pesë ditë pas humbjes së finales

Lautaro Martinez, i cili aktualisht ndodhet në Los Anxhelos me Interin për Botërorin e Klubeve të FIFA-s, ende po përballet me dhimbjen e madhe pas humbjes së rëndë 5-0 në finale të Champions League kundër PSG-së. Sulmuesi argjentinas foli hapur në një intervistë, duke shprehur dhimbjen e asaj nate të paharrueshme.

Më 31 maj në Mynih, Martinez mbante peshën e humbjes mbi supet e tij si kapiten i Interit, duke reflektuar me fytyrë të zymtë dhimbjen e thellë të skuadrës pas këtij goditjeje të fortë nga kampionët francezë.

Pak më shumë se dy javë më vonë, ai ishte sërish në fushë për ndeshjen e parë të Interit në Botërorin e Klubeve kundër Monterrey-t në Universitetin e Kalifornisë në Los Anxhelos. Mes vapës së Kalifornisë, Lautaro ndau me të gjithë ndjenjat e tij: foli për nevojën për të “kthyer faqen dhe mos u kapur pas asaj që ndodhi”, por pranoi se ende nuk e kupton plotësisht se si humbën një mundësi kaq të madhe.

Në fillim të qershorit, Lautaro u thirr nga përzgjedhësi Lionel Scaloni për ndeshjet kualifikuese të Botërorit ndaj Kilit dhe Kolumbisë, por qëndroi në stol për shkak të lodhjes. Vetë lojtari u shpreh: “Isha i trishtuar dhe nuk e kuptoja pse. Nuk kam folur për pesë apo gjashtë ditë. Ajo natë, kundër PSG-së, nuk funksionoi asgjë, humbëm gjithçka; nuk ishim ne, nuk ishim ekip. Ky është futbolli. Tani duhet të ecim përpara, sepse nuk ka tjetër mënyrë, edhe pse akoma më mban mendja aty.”

Ndërsa Interi kërkon shpagim në tokën amerikane, Lautaro është i vendosur të ngrejë moralin e tij dhe të skuadrës. “Kam folur me shokët e skuadrës, u kam kërkuar të jenë fortë psikologjikisht dhe u kam shpjeguar se na duhet një përpjekje e fundit para pushimeve një përpjekje për të vazhduar përmirësimin,” tha ai me vendosmëri. “Jam i trishtuar që nuk ngrita një trofe këtë sezon. Por duke bërë një bilanc, nuk ishte një vit për t’u harruar. Le të na shërbejë si motiv për të nisur përsëri me të njëjtën zjarr dhe përkushtim si gjithmonë. Ne jemi Interi, një skuadër e rritur, gjithmonë duke synuar ‘yjet’. Jemi këtu për të dhënë gjithçka në këtë Botëror Klubesh, dhe unë jam i përkushtuar të ndihmoj skuadrën,” përfundoi ai me pasion në sytë e tij.

© SYRI.net

Lexo edhe:

• VIDEO/ Zvicra kalon në avantazh të dyfishtë ndaj Kanadasë, realizojnë Vargas dhe Manzambi
• Messi lë të hapur derën për Botërorin 2030: Nuk e di, nuk po mendoj për këtë tani
• Ronaldo dhe Karimov hyjnë në histori, Botërori regjistron një duel unik mes dy brezave