De Biasi: S’jam kontaktuar nga Federata, Gattuso? Trajneri dhe përzgjedhësi janë dy role krejt të ndryshme

Trajneri Gianni De Biasi ka folur për “Radio Anch’Io Sport” në Radio Rai, duke komentuar emërimin e Gennaro Gattusos si përzgjedhës i ri i Italisë:

“Rino është një njeri me karakter dhe vendosmëri. E ka treguar këtë si futbollist dhe si trajner. Por nuk është vetëm çështje personaliteti, duhet parë se si do të përshtatet filozofia e tij me lojtarët që ka në dispozicion. Gattuso e njeh ambientin, por kjo nuk është zgjidhja për gjithçka.”

Fillimi i epokës Gattuso:

“Të kesh kohë përpara është thelbësore. Ai do të ketë mundësinë të kontaktojë lojtarët që përputhen me idetë e tij dhe ky është një hap përpara. Duhet parë në çfarë forme fizike do të jenë për dy ndeshjet e ardhshme, që nuk janë tepër të vështira. Por do të jetë e rëndësishme që Rino të nisë mirë dhe të kërkojë konkretësi, duke kuptuar që të jesh përzgjedhës është diçka krejt tjetër nga të qenit trajner. Janë dy profesione të ndryshme: i sheh lojtarët rrallë, por duhet t’i bësh të ndihen të rëndësishëm dhe të përkëdhelur, ndërkohë që i bën të kuptojnë edhe përgjegjësinë që mbajnë.”

Për ata që thonë se mungon përkushtimi për fanellën e Italisë:

“E kaltra është ngjyra e emocioneve tona. Duhet të jemi më të mirëkuptueshëm: futbollistët kanë ndryshuar mentalitet dhe imazh. Por kur vesh fanellën e Italisë, duhet të japësh 150% të gjithçkaje që ke brenda. Ky do të ishte kushti i parë me të cilin do t’i flisja çdo lojtari që do të thërrisja në Kombëtare.”

Prandelli dhe Bonucci si pjesë e stafit të Gattusos?

“Pyetja e parë që i bëj vetes është: ‘A do të jetë Rino i kënaqur me gjithë këta njerëz rreth tij?’. Gjëja më e rëndësishme është që ata të mos jenë aty vetëm për të zbukuruar ‘dhuratën’. Shumë njerëz mund të ndihmojnë, por gjithashtu mund të sjellin konfuzion  me shumë ‘gjela’ në të njëjtin kotec.”

A jeni kontaktuar ndonjëherë nga presidenti Gravina?

“Sinqerisht, nuk jam kontaktuar kurrë nga Federata. Nëse do të më kontaktonin, do të isha shumë i gatshëm të jepja këshilla, pasi kam nëntë vite eksperiencë në nivel kombëtaresh.”

Dëshira për Brescia-n...?

“Shpresoj që Brescia të mos zhduket nga futbolli, ashtu siç ndoshta dikush ka tentuar të bëjë.”

© SYRI.net

Lexo edhe:

• VIDEO/ Zvicra kalon në avantazh të dyfishtë ndaj Kanadasë, realizojnë Vargas dhe Manzambi
• Messi lë të hapur derën për Botërorin 2030: Nuk e di, nuk po mendoj për këtë tani
• Ronaldo dhe Karimov hyjnë në histori, Botërori regjistron një duel unik mes dy brezave