Nga karta ID te kamerat e sigurisë, FSHF u tërheq vëmendjen tifozëve para sfidës Shqipëri–Serbi

Vetëm pak orë para sfidës së shumëpritur Shqipëri–Serbi, Federata Shqiptare e Futbollit (FSHF) ka publikuar një listë me rregulla të qarta që çdo tifoz duhet të ndjekë për të hyrë në stadiumin “Air Albania”. Përballja do të luhet sonte, në orën 20:45, dhe është e vlefshme për kualifikueset e Kupës së Botës 2026.

Duke qenë se interesimi për këtë ndeshje është i jashtëzakonshëm dhe stadiumi pritet të jetë i mbushur plot, FSHF-ja ka ndërmarrë masa të rrepta sigurie me qëllim që gjithçka të zhvillohet në mënyrë të qetë dhe të kontrolluar.

Ja çfarë duhet të dini për të hyrë në stadium:

• Karta e identitetit – Çdo tifoz duhet të ketë me vete një dokument identifikimi (ID) që do të kontrollohet në hyrje. Pa ID nuk do të lejoheni të hyni në ambientet e stadiumit, edhe nëse posedoni një biletë të vlefshme.

• Kontrolle të rrepta – Para hyrjes në stadium do të kryhen kontrolle fizike dhe të çantave. Nuk do të lejohet hyrja me sende të forta, pije alkoolike, mjete piroteknike apo materiale propagandistike.

• Mbikëqyrje me kamera – I gjithë stadiumi do të jetë nën vëzhgim të vazhdueshëm me kamera sigurie. Çdo sjellje e papërshtatshme apo veprim që cenon rendin do të identifikohet menjëherë dhe do të ndiqet penalisht nëse është e nevojshme.

• Mbërrini herët – Për të shmangur radhët e gjata dhe vonesat, tifozët këshillohen të mbërrijnë në stadium disa orë përpara fillimit të ndeshjes.

FSHF-ja apelon për sjellje korrekte dhe atmosferë festive, duke theksuar se për këtë ndeshje është e rëndësishme që të dominojë sportiviteti dhe mbështetja për Kombëtaren, jo provokimi apo incidentet.

Në një përballje me ngarkesë historike dhe emocionale si kjo me Serbinë, çdo veprim i tifozëve është nën vëzhgim. Prandaj, mbështesim Shqipërinë me zemër, por edhe me përgjegjësi!

© SYRI.net

Lexo edhe:

• VIDEO/ Zvicra kalon në avantazh të dyfishtë ndaj Kanadasë, realizojnë Vargas dhe Manzambi
• Messi lë të hapur derën për Botërorin 2030: Nuk e di, nuk po mendoj për këtë tani
• Ronaldo dhe Karimov hyjnë në histori, Botërori regjistron një duel unik mes dy brezave