Messi i dha fitoren Inter Miamit në -15 gradë, Mascherano: Nuk është njerëzore të luash në këto kushte

Inter Miami arriti një fitore më shumë se të rëndësishme në ndeshjen e tij të parë të sezonit në Concachampions. Falë një goli të Leo Messit, skuadra nga Florida doli me avantazh nga i ftohti i acartë i Kansasit dhe tani do të duhet vetëm të konfirmojë kualifikimin në shtëpi brenda më pak se një jave.

Një "ferr i bardhë" për Inter Miami

I ftohti ekstreme ishte elementi kryesor i ndeshjes. Shumica e lojtarëve kishin të zbuluar vetëm fytyrën, ndërsa pjesën tjetër të trupit e kishin mbuluar me rroba termike, doreza dhe çdo mjet tjetër që mund të ndihmonte në ruajtjen e temperaturës trupore. Gjatë ndeshjes, temperatura në fushë arriti deri në -15°C, me një ndjesi termike që shkonte deri në -20°C, diçka krejtësisht e re për shumicën e lojtarëve të Inter Miami, të cilët u detyruan të luftonin në një "ferr të bardhë".

Në përfundim të ndeshjes, trajneri Javier Mascherano foli për këtë përvojë ekstreme:

"Jam krenar për ekipin tim. Është e pamundur të luash në këto kushte, nuk është njerëzore," tha ‘El Jefecito’, duke komentuar ndjesitë nga ndeshja e parë zyrtare e sezonit.

Gjithashtu, trajneri pranoi se ekipi nuk ishte plotësisht i përgatitur për të përballuar një situatë të tillë në Kansas:

"Asnjëherë më parë nuk kam përjetuar një situatë me kaq të ftohtë. Nuk ndienim gjymtyrët e trupit," u shpreh Mascherano, i cili gjithashtu vlerësoi përpjekjen dhe sakrificën e lojtarëve, të cilët ishin ata që e përjetuan më shumë këtë vuajtje:

"E fituam ndeshjen falë karakterit të lojtarëve. Kushtet ishin shumë të vështira, por gjithsesi arritëm ta luanim dhe ta menaxhonim mirë."

Rikthimi në Miamin e ngrohtë

Tani ekipi kthehet në shtëpi me gjysmën e kualifikimit në xhep. Në një ambient shumë më të favorshëm, ata do të luajnë ndeshjen e kthimit në stadiumin e tyre, përpara tifozëve të tyre. Performanca e shkëlqyer e Busquets dhe Messit në ndeshjen e parë ka rritur optimizmin për skuadrën.

Për më tepër, temperaturat më të larta pritet të ndikojnë pozitivisht në gjurin e Luis Suárez, duke i dhënë mundësinë të tregojë një version më të mirë të vetes në ndeshjen e kthimit.

© SYRI.net

Lexo edhe:

• Skuadrat e eliminuara zyrtarisht nga Botërori 2026, zhgënjimi më i madh deri tani është Turqia
• FIFA bën gati revolucionin e penalltive, pritet vendimi para fazës eliminatore të Botërorit
• Tragjedi në Francë, ndërron jetë në moshën 21-vjeçare futbollisti i Guingamp-it