Leipzig siguron përfundimisht Xavi Simons për 80 milionë euro, asnjë pengesë për kalimin e Skriniar-it te Fenerbahce

RB Leipzig ka arritur përfundimisht marrëveshjen për transferimin e Xavi Simons, i cili ishte huazuar te klubi gjerman që nga viti 2023, për një shumë që arrin në 80 milionë euro, duke përfshirë edhe bonuset. Holandezi 21-vjeçar ishte në pronësi të PSG-së, por refuzimi i tij për t'u rikthyer në Paris dhe dëshira e klubit francez për ta shitur përshpejtuan negociatat, ashtu siç raportoi fillimisht RMC Sport dhe më pas u konfirmua nga AS.

Pse PSG nuk mund ta shiste më herët?

Paris Saint-Germain nuk mund ta shiste Xavi Simons deri në janar të vitit 2025, pasi PSV, klubi ku ai ishte huazuar para se të shkonte te Leipzig, kishte një klauzolë që i jepte të drejtën ta rikthente nëse një klub tjetër bënte një ofertë zyrtare për ta transferuar. Me skadimin e kësaj klauzole, Leipzigu vendosi të përshpejtonte bisedimet dhe arriti marrëveshje të enjten me PSG-në: 50 milionë euro fikse dhe 30 milionë euro bonuse të lehta për t'u realizuar.

Një lëvizje e suksesshme për PSG

Shitja e Simons është një sukses për PSG-në, e cila, megjithëse u përpoq ta rikthente lojtarin në verë me kërkesë të Luis Enrique-s, nuk mundi ta bindte. Simons refuzoi të rikthehej në Paris dhe preferoi të qëndronte te Leipzig-u, ku shkëlqeu sezonin e kaluar dhe ku është lojtari më i rëndësishëm i ekipit. Ai do të vazhdojë të rritet në Bundesliga përpara se, ndoshta, të kalojë në një klub më të madh në të ardhmen.

Transferimi i Simons lejon PSG-në të lirojë Skriniar

Ky transferim gjithashtu i jep PSG-së mundësinë për të kryer një tjetër operacion të lidhur me rregullat e UEFA-s. Klubi francez nuk mund ta largonte Milan Skriniar-in te Fenerbahçe pa liruar një huazim, pasi kishte arritur kufirin maksimal të gjashtë lojtarëve të huazuar jashtë vendit. Tani që Simons është shitur përfundimisht, PSG do ta zyrtarizojë huazimin e Skriniar-it te Fenerbahçe në orët e ardhshme.

Kjo marrëveshje ndihmon PSG-në të balancojë financat e saj, vetëm disa ditë pasi klubi ka finalizuar transferimin e Khvicha Kvaratskhelia-s nga Napoli për 70 milionë euro.

© SYRI.net

Lexo edhe:

• FIFA bën gati revolucionin e penalltive, pritet vendimi para fazës eliminatore të Botërorit
• Tragjedi në Francë, ndërron jetë në moshën 21-vjeçare futbollisti i Guingamp-it
• Deschamps largohet nga Botërori, ndërron jetë nëna e trajnerit të Francës