Putinizmi Made in Albania: Si po e shkatërron Edi Rama demokracinë

Zgjedhjet e sotme në Shqipëri janë një farsë e mirëorkestruar, jo një akt demokratik. Ajo që ndodh në terren është një teatër i shpifur ku qytetarët nuk votojnë të lirë, por të kërcënuar, të shantazhuar dhe të manipuluar nga një makineri pushteti që s’ka më asnjë lidhje me standardet evropiane. Në krye të kësaj makinerie është Edi Rama – një lider që ka kaluar nga fasada e progresit në realitetin e një sundimtari autokratik, që po e kthen Shqipërinë në një kopje të vogël të Rusisë së Putinit.

Pushteti i Ramës është ngritur mbi frikën, patronazhimin, kontrollin total të administratës, blerjen e votës dhe përdorimin brutal të çdo institucioni shtetëror për qëllime elektorale. Ai nuk garon për të fituar me ide, por për të shtypur çdo opozitë dhe për të mbajtur pushtetin me çdo kusht. Nga drejtësia e reformuar sipas interesit të tij, tek mediat e kapura dhe rrjetet sociale të mbushura me propagandë, gjithçka shërben për një qëllim të vetëm: ta shndërrojë Shqipërinë në një vend ku vetëm një zë ka të drejtë të dëgjohet.

Kjo nuk është demokraci. Është autokraci me votime. Është një sistem që po i bën qytetarët të heshtin, të largohen, ose të përulen. Edi Rama nuk është më thjesht kryeministër – ai sillet si një monark modern, i pakontestueshëm, që përdor pushtetin jo për të qeverisur, por për të sunduar.

Nëse Shqipëria vazhdon kështu, vota do jetë vetëm një ritual bosh, ndërsa liria do jetë një kujtim i largët. Është koha për t’u përballur me të vërtetën: zgjedhjet nuk janë më mjeti për ndryshim – janë mekanizmi me të cilin ruhet status quo-ja e një regjimi në ndërtim.

Nga kjo duhet ta dijmë se Kosova duhet ta shohë me kujdes rrugën ku ka hyrë Shqipëria dhe të mësojë prej saj se çfarë ndodh kur pushteti i një njeriu bëhet më i fortë se institucionet. Demokracia nuk ndërtohet me liderë që s’kontestohen, por me institucione të forta, opozitë funksionale dhe media të lira. Nëse Kosova nis të tolerojë kapjen e shtetit, kontrollin e drejtësisë, shuarjen e debatit dhe glorifikimin e liderit në vend të ligjit, atëherë shumë shpejt mund të shndërrohet në një version të Shqipërisë – një vend ku vota është fasadë, qytetari është i nëpërkëmbur dhe pushteti është gjithçka. Kosova ka ende mundësinë të zgjedhë një rrugë tjetër – atë të demokracisë së vërtetë, dhe jo të iluzionit autokratik të “stabilitetit”.

© SYRI.net

Lexo edhe

• Intriga politike e non gratës pati fatin e tragjedisë Makbeth
• Rama një hu gardhi, që vetëm tangat i mungojnë!
• Diktatori i flamingove nuk mund të ndalojë fluturimin e lirë të shqiponjave

Tags