Vjosa Osmani e merr edhe Albena Reshitaj nga GUXO, zyrtarizohet bashkimi politik

Presidentja e Kosovës, Vjosa Osmani, ka njoftuar për vazhdimin e bashkëpunimit politik me Albena Reshitaj, përmes një postimi në Facebook.

Osmani e ka vlerësuar Reshitajn si një grua parimore dhe me bindje të qëndrueshme politike, duke kujtuar edhe rolin e saj në zgjedhjen e presidentes në vitin 2021.

Sipas Osmanit, vota e Reshitajt në atë kohë ishte vendimtare për krijimin e kuorumit të nevojshëm dhe për të bllokuar, siç u shpreh ajo, “rolin e Listës Serbe në krijimin e institucioneve”.

“Ajo dëshmoi shumëherë, e po e dëshmon edhe sot se politika mund të ndërtohet mbi dinjitet, integritet dhe vizion për Kosovën”, ka shkruar Osmani.

Presidentja theksoi se Kosova ka nevojë për njerëz që dinë të bashkëpunojnë dhe jo për përçarje, ndërsa shtoi se Reshitaj do të vazhdojë të mbrojë kauzat shtetërore dhe kombëtare.

Në fund të postimit, Osmani u shpreh e bindur se qytetarët do ta vlerësojnë sërish “parimësinë, guximin dhe profesionalizmin” e Albena Reshitajt.

Postimi: 

Një bashkëpunim i filluar më shumë se një dekadë më parë, e i ndërtuar mes sfidash e suksesesh të përbashkëta, po vazhdon edhe sot.
Prof.asoc.dr. Albena Reshitaj, ish ministre, deputete në 4 mandate, e mbi të gjitha një grua parimore dhe me bindje politike të qëndrueshme, ka dëshmuar vazhdimisht se nuk dorëzohet para asnjë sfide apo kërcënimi, kur është në pyetje mbrojtja e interesit të Kosovës.
Kur u zgjodha Presidente në vitin 2021, me votën e saj vendimtare, Albena krijoi kuorumin e nevojshëm dhe bllokoi rolin e Listës serbe në krijimin e institucioneve, pa asnjë interes personal e pa kërkuar absolutisht asgjë!
Ajo dëshmoi shumëherë, e po e dëshmon edhe sot se politika mund të ndërtohet mbi dinjitet, integritet dhe vizion për Kosovën, e gjithnjë e palëkundur para atyre që nuk e njohin Kosovën si dhe para atyre që dojnë të shkatërrojnë gjithçka që është ndërtuar me sakrificë. Kosova ka nevojë për njerëz që dijnë të punojnë bashkë, e jo për të tillë që dojnë të shkatërrojnë njëri-tjetrin.
Si trashëgimtare e një familjeje atdhetare, mbesë e Ramë Bllacës, ajo do të vazhdojë të mbrojë kauza për të cilat është sakrifikuar ndër shekuj. Kosova do ta ketë nderin ta ketë deputete, ndërsa qytetarët tanë kanë mundësinë që edhe njëherë të vlerësojnë parimësinë, guximin, nderin, besnikërinë ndaj shtetit dhe profesionalizmin e Albenës. Na priftë e mbara. [💕]
 

© SYRI.net

Lexo edhe:

• Vdes në QKUK fëmija që ishte rrëzuar me trotinet elektrik në Gjilan
• Këto janë çmimet e derivateve për sot dhe nesër
• VIDEO LIVE/ Protestuesit nisin marshimin dhe rrethojnë kryeministrinë