Policia greke ka arrestuar katër persona të dyshuar për përfshirje në vrasjen e mafiozit grek Jorgos Moskouris, ngjarje e ndodhur në prill 2025 në Halandri.
Operacioni u zhvillua të martën, më 6 maj, pas një hetimi disamujor nga Departamenti i Vrasjeve. Të arrestuarit dyshohet se kanë qenë pjesë e grupit mbështetës të autorëve që ekzekutuan 55-vjeçarin jashtë një klinike private në Halandri, më 24 prill 2025.
Sipas autoriteteve greke, të arrestuarit janë dy shtetas grekë me origjinë shqiptare, Dhionis Kokoni dhe një person me mbiemrin Jupe, si edhe dy shtetas grekë: Dhimitris Aleksopoulos dhe Aleksandros Petropoulos.
Sipas hetimeve, katër të dyshuarit kishin marrë përsipër mbështetjen operative të atentatit, duke siguruar armë, automjete, transport dhe ndihmë logjistike për ekzekutorët e huaj, të cilët dyshohet se mbërritën në Greqi vetëm për kryerjen e vrasjes dhe u larguan menjëherë pas saj.
Hetimet e policisë greke janë fokusuar tashmë tek i ashtuquajturi Entik, i konsideruar si një figurë kyçe e mafias rusishtfolëse dhe që besohet se ndodhet në Dubai. Autoritetet dyshojnë se urdhri për eliminimin e Moskouris lidhet me përplasjet për kontrollin e kontrabandës së duhanit, aktivitet ku viktima thuhet se ishte përfshirë së fundmi.
Në hetim përfshihet edhe Janis Lalas, i cili më herët kishte bashkëpunuar me viktimën, përpara se marrëdhënia mes tyre të prishej. Sipas burimeve policore, vëllezërit Lalas më pas u lidhën me grupin e ‘Entik’, ndërsa autoritetet po hetojnë mundësinë e një përfshirjeje të përbashkët në atentat.
Katër të arrestuarit përballen edhe me akuza të tjera që lidhen me krimin e organizuar, përfshirë një shpërthim në një shitës automjetesh në Nea Erythraia në gusht 2024, biznes që dyshohet se kishte bashkëpunim me Moskouris.
Ata akuzohen gjithashtu për shkelje të të dhënave personale, pasi dyshohet se kishin vendosur një pajisje GPS në automjetin e një avokateje të lidhur me një drejtues të burgosur të mafias greke. Policia zbuloi edhe kamera mbikëqyrjeje pranë banesës së saj, çka ka shtuar dyshimet se po planifikohej një tjetër atentat.
Pavarësisht arrestimeve, autorët e drejtpërdrejtë të ekzekutimit mbeten ende në kërkim. Autoritetet greke po kërkojnë të paktën dy shtetas të huaj, të cilët dyshohet se kanë vepruar me profesionalizëm të lartë.
Mënyra e atentatit kishte ngritur që në fillim dyshime për përfshirjen e mafias rusishtfolëse. Egërsia e sulmit, përdorimi i kallashnikovit dhe mungesa e shqetësimit për viktima të mundshme kolaterale u konsideruan karakteristika të ekzekutimeve të ngjashme që i atribuohen grupeve kriminale të Bllokut Lindor.
Sipas policisë, e njëjta mënyrë veprimi është konstatuar edhe në vrasjet e Zambounis, Roumpetis, Mouzakitis dhe Skaftouros, raste që u atribuohen grupeve rivale të mafias greke.
Vrasja e Moskouris ndodhi pasditen e 24 prillit 2025, jashtë një klinike private në Halandri. Autorët kishin organizuar një pritë dhe hapën zjarr me kallashnikovë në momentin kur viktima po i afrohej automjetit të tij.
55-vjeçari mbeti i vdekur në trotuar, ndërsa autorët u larguan me një automjet që më vonë u gjet i djegur në zonën e Patima. Sipas hetimeve, makina ishte vjedhur nga një grua, e cila ende nuk kishte arritur ta denonconte vjedhjen në polici.
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Vdes në QKUK fëmija që ishte rrëzuar me trotinet elektrik në Gjilan
Këto janë çmimet e derivateve për sot dhe nesër
VIDEO LIVE/ Protestuesit nisin marshimin dhe rrethojnë kryeministrinë