Nis takimi trepalësh në Bruksel

11:25, 04/04/2024

Ka nisur takimi trepalësh në Bruksel, ndërmjet kryenegociatorit të Kosovës, Besnik Bislimi dhe atij të Serbisë, Petar Petkoviq, me ndërmjetësimin e të dërguarit të BE-së, Miroslav Lajçak në përpjekje për të gjetur një zgjidhje për çështjen e dinarit serb,.

Takimi raportohet se ka nisur rreth orës 10:00, derisa paraprakisht kishte një takim në mes të Lajçakut dhe Petkoviqit.

Në Bruksel, më 25 mars, pati përfunduar pa marrëveshje takimi i kryenegociatorëve të Kosovës dhe Serbisë për çështjen e dinarit serb, përdorimi i të cilit si mjet pagese me para në dorë, është i ndaluar në Kosovë që nga muaji i kaluar.

I dërguari i posaçëm i BE-së për dialogun, Miroslav Lajçak, së fundi shprehu shpresën se mosmarrëveshjet e mbetura do të tejkalohen gjatë bisedimeve të sotme.

Ai vlerësoi se takimi i kaluar në nivel të negociatorëve kryesorë, i cili u mbajt më 25 mars, ka qenë konstruktiv, se të dyja palët kanë pasur mundësi të shpjegojnë idetë dhe qëndrimet e tyre dhe se është konstatuar se nevojitet një takim tjetër.

Kryenegociatori i Kosovës, Besnik Bislimi, tha atë ditë se mendon që ka nevojë edhe për një takim shtesë për çështjen e dinarit serb, pas takimeve që zhvilloi me kryenegociatorin e Serbisë, Petar Petkoviq, nën ndërmjetësimin e Bashkimit Evropian.

“Mendimi im është se këto propozime ende janë shumë larg njëra-tjetrës. Ne tentuam të afroheshim, por si duket ka nevojë për një takim shtesë, ndoshta Lajçak do të ofrojë që ai të mbahet javën e ardhshme”, tha Bislimi.

Takimi i sotëm do të jetë i dyti në javët e fundit mes kryenegociatorit të Kosovës, Besnik Bislimi dhe atij të Serbisë, Petar Petkoviq, ndërsa i treti në përgjithësi për këtë çështje në Bruksel.

© SYRI.net

Lexo edhe:

• Abdixhiku: Do të ndërtojmë termocentral me gaz gjysmë miliardësh – koeficienti për paga do të jetë 150 euro
• Osmani pret në takim Peneveyren, flasin rreth anëtarësimit të Kosovës në Këshillin e Evropës
• Serbia ngre flamurin e bardhë? Vuçiç: Ka shumë gjasa që Kosova të anëtarësohet në Këshillin e Evropës