Organet e rendit të martën kanë bastisur tezgën e një shitësi ambulant në Çarshinë e Gjatë në Pejë. Shitësi u arrestua e më pas u lirua me procedurë të rregullt.
Njëra nga tezgat e shitësve ambulant në Çarshinë e Gjatë në Pejë po ofronte për shitje diçka të paligjshme.
Krejt kjo ndërhyrje e Policisë së Kosovës rezultoi me arrestimin e shitësit dhe sekuestrimin e hiç më pa se 105 mjeteve të mprehta të llojeve të ndryshme, tri shufrave metalike, 11 boksave të hekurt, 4 sprejve e një elektroshoku.
Pas arrestimit, policia ka njoftuar se shitësi është liruar në procedurë të rregullt.
Të dyshuarin për këtë rast e njohin edhe qytetarët. Ata pohojnë se gjatë së martës shitësi vazhdonte qëndrimin këtu dhe shiste pa asnjë pengesë produktet e tij.
Që vazhdimisht shiten pa asnjë ndalesë armë të tilla këtu e thonë vetë banorët. Por ata kërkojnë kontroll të shtuar nga organet e rendit.
“Armët e ftohta shiten te xhamia e Pejës, nëpër tavolina, çeltazi”, tha njëri prej qytetarëve.
Që janë shitur armë e pohon edhe zëdhënësi i Komunës së Pejës, Faik Zeka.
“Me të thënë të drejtën ata prej pasluftës janë aty t’u shitë. Komuna mundet me i mbikëqyrë për ekspozim të tepërt të mallit edhe se a i kanë hapësirat e lejuara por jo se çka me shitë. Ajo është kompetencë e policisë”, tha Zeka.
Zeka tregon që një pjesë e shitësve ambulant qëndrojnë aty me marrëveshje.
Komuna e Pejës ka propozuar dy lokacione për vendosjen e shitësve ambulantë mirëpo tregtarët nuk kanë pranuar. Megjithatë, kjo nuk nënkupton se në këto lokacione të propozuara lejohet shitja e produkteve të rrezikshme.
© SYRI.net