Kush është eurodeputetja, favorite për presidencën e Parlamentit Europian?

11:12, 18/01/2022

Roberta Metsola, anëtare e grupit të krahut të djathtë EPP nga Malta, është mes katër kandidatëve për këtë pozicion, së bashku me Sira Rego të Spanjës (radikalja e majtë), Kosma Zlotowski e Polonisë (ECR, Euroskeptikët) dhe Alice Bah Kuhnke e Suedisë (të Gjelbërit). Secili do të paraqesë programin e tij te kolegët e tij eurodeputetë në Strasburg të martën për të pasuar Sassolin, i cili vdiq më 11 janar dhe mandati i të cilit përfundoi këtë javë.

Metsola është eurodeputete që nga viti 2013 dhe nënkryetare e Parlamentit që nga viti 2020. Ligjvënësja konservatore së fundmi fitoi shikueshmëri duke marrë detyrën nga Sassoli, i cili mungoi në sallë për disa javë për shkak të sëmundjes.

Por nëna e katër fëmijëve ka tërhequr gjithashtu kritika nga disa prej kolegëve të saj për pikëpamjet e saj kundër abortit, të cilat mbahen gjerësisht në Maltë, vendi i fundit i BE-së ku aborti është ende plotësisht i paligjshëm. E vetëdijshme për rezervat që ka ngjallur për këtë çështje, ajo siguroi se nëse zgjidhet, “detyra e saj do të jetë të përfaqësojë qëndrimin e Kuvendit”, duke përfshirë edhe të drejtat seksuale dhe riprodhuese.

Nëse zgjidhet, Metsola do të jetë gruaja e tretë që do të kryesojë asamblenë prej 705 anëtarësh, pas Simone Veil të Francës (1979-1982) dhe Nicole Fontaine (1999-2002).

Për t’u zgjedhur, një kandidat duhet të marrë shumicën absolute të votave të hedhura me votim të fshehtë. Nëse pas tre raundeve të votimit nuk arrihet shumica absolute, organizohet raundi i katërt me dy kandidatët që kanë marrë më shumë vota në raundin e kaluar. Votimi do të zhvillohet në distancë, për shkak të situatës shëndetësore.

Përveç presidentit, gjatë seancës do të zgjidhen jo më pak se 14 nënkryetarë, për një mandat dy vjet e gjysmë. Po ashtu do të rinovohen edhe pozicionet e kryetarëve të komisioneve parlamentare dhe delegacioneve europiane, duke nxitur pazare të ashpra mes grupeve politike.

Sipas rregullores së parlamentit, presidenti ka një sërë kompetencash, duke përfshirë vendosjen për pranueshmërinë e teksteve dhe amendamenteve të paraqitura në kuvend për votim, përveç drejtimit të debateve. Ai ose ajo gjithashtu përfaqëson institucionin në samitet europiane të 27 shteteve anëtare. 

© SYRI.net

Lexo edhe:

• Studentët ndërprejnë Konferencën e MAShTI-t, kërkojnë përjashtimin e Xhevat Krasniqit nga UP-ja
• Hoti: Raporti i BB-së demanton propagandën e pushtetit për zhvillim ekonomik
• Arrestohen dy shqiptarë në Milano, u kapën me heroinë