Tani në një vendim të Komisionit Komunal prej pesë anëtarësh, Qeriqit i është shqiptuar një vërejtje me shkrim. Vendimi thotë se ajo ka shkelur etikën profesionale.

“Kjo vërejtje është e fundit e cila ka për qëllim ta përmirësojë, këshillojë dhe paralajmërojë për masat e tjera disiplinore në rast të shkeljes konform dispozitave ligjore”, thuhet midis të tjerash në vërejtje, duke sqaruar se vërejtja i është shqiptuar nga komisioni disiplinor ne proporcion me pasojat e shkaktuara dhe vendoset në dosjen personale të punëtorit, ku e njëjta vërejtje i shlyhej pas dy vitesh nga dita e pranimit, nëse ndaj të punësuarit nuk është marrë ndonjë masë tjetër brenda.

Qeriqi këtë vërejtje e ka konsideruar si kërcënim dhe shkelje të të drejtave të saj. Ajo ka thënë se ligji ia lejon infermierëve emergjentë t’u ndihmojnë qytetarëve edhe në rrugë në periudha emergjente. Qeriqi e cila njëherësh është edhe kuvendare në Kuvendin Komunal të Lipjanit nga radhët e opozitës (PDK), ka thënë se vërejtja i është dhënë nga këndi politik dhe është kërcënuar me vërejtje të fundit.

“Unë si infermiere e Emergjencës më lejohet sipas ligjit t’i ndihmoj qytetarët qoftë në rrugë apo në ndonjë aksident. Ndërkaq, rasti i infuzionit është bërë e madhe për qëllime politike, por nga ana ime ka pasur qëllim të mirë për ta ndihmuar një pacient në kohë të pandemisë derisa hapësirat kanë qenë të kufizuara. Dhënia e kësaj vërejtje është e paarsyeshme, andaj jam duke e shqyrtuar mundësinë që t’i drejtohem organeve të inspektoratit shëndetësor”, ka thënë Qeriqi për KOHËN.