Kontrollorët francezë të trafikut ajror kanë paralajmëruar një grevë në datat 3 dhe 4 korrik, në një moment kritik kur nis sezoni i pushimeve verore për miliona udhëtarë në Evropë. Sindikata UNSA-ICNA, e dyta më e madhe në sektor, ka paraqitur një mocion greve duke akuzuar Autoritetin e Aviacionit Civil për menaxhim “toksik” dhe “autoritar”, teksa kërkon shtim të stafit dhe rritje pagash. Edhe sindikata USAC-CGT ka njoftuar pjesëmarrje në grevë më 3 korrik, ndërsa SNCTA, sindikata më e madhe, nuk ka paralajmëruar veprim industrial.
Greva vjen në një nga periudhat më të ngarkuara të vitit për trafikun ajror në Francë, pasi shkollat fillojnë pushimet më 4 dhe 5 korrik. DGAC ka paralajmëruar se ndikimi pritet të jetë i lartë, me vonesa dhe anulime të konsiderueshme në aeroportet franceze, si dhe në fluturimet që kalojnë përmes hapësirës ajrore franceze. Destinacionet si Belgjika, Portugalia, Spanja dhe Maroku mund të preken ndjeshëm, për shkak të ridrejtimit të avionëve.
Pavarësisht përpjekjeve për negociata, takimi i fundit mes sindikatave dhe DGAC nuk solli zgjidhje. Ligji i ri që detyron kontrollorët të njoftojnë grevën 48 orë më parë pritet të ndihmojë në menaxhimin e krizës, por rreziku për kaos mbetet. Greva e ardhshme është e para që nga viti 2024, pasi vjet u respektua një “armëpushim olimpik”, ndërsa në vitin 2023 grevat prekën mbi 10 milionë pasagjerë në të gjithë Evropën.
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Vala e të nxehtit në Itali lë 5 të vdekur, 17 qytete në alarm të kuq
Trump: Irani po bën lëshime shumë të mëdha
Rubio: Grupi teknik për Iranin do të ritakohet javën e ardhshme