Koreja e Veriut do të dërgojë më shumë ushtarë në Ukrainë përgjatë muajit korrik ose gusht, thotë Seuli

Koreja e Veriut mund të dërgojë më shumë trupa në Rusi gjatë korrikut ose gushtit për t’u bashkuar në konfliktin në Ukrainë, ndërkohë që vijon të furnizojë Moskën me armë, sipas ligjvënësve të Koresë së Jugut që bazohen në informacionet e Shërbimit Kombëtar të Inteligjencës (NIS).

“NIS beson se Rusia po përgatitet për një sulm të gjerë ndaj Ukrainës në korrik ose gusht,” tha ligjvënësi koreano-jugor, Lee Seong-kyun, pas një takimi me dyer të mbyllura.

“Vendosja e trupave shtesë mund të ndodhë që në korrik ose gusht,” shtoi ai, duke cituar edhe një grumbullim të ri trupash nga ana e Koresë së Veriut dhe vizitën e fundit në Phenian të Sekretarit të Këshillit të Sigurisë Rus, Sergei Shoigu, i cili u takua me Kim Jong Un më 17 qershor, në një takim të organizuar nga Presidenti Putin.

Në këmbim të dërgesave të municioneve të artilerisë dhe raketave nga Pheniani për Rusinë, Koreja e Veriut pritet të marrë ndihmë teknike lidhur me lançimet satelitore dhe sistemet e udhëzimit të raketave, sipas të dhënave të NIS, të cituara nga Lee.

Pas muajsh heshtjeje, Koreja e Veriut dhe Rusia kanë konfirmuar praninë e trupave koreano-veriore në Ukrainë dhe rolin e tyre në ofensivën e Moskës për rimarrjen e rajonit Kursk.

Të dy vendet theksuan se bashkëpunimi i tyre bazohet në marrëveshjen e nënshkruar nga udhëheqësit e tyre në qershor të vitit të kaluar, e cila përfshin marrëveshje të ndërsjella bashkëpunimi në fushën e mbrojtjes. Syri.net-Protothema

© SYRI.net

Lexo edhe:

• Vala e të nxehtit në Itali lë 5 të vdekur, 17 qytete në alarm të kuq
• Trump: Irani po bën lëshime shumë të mëdha
• Rubio: Grupi teknik për Iranin do të ritakohet javën e ardhshme