Koreja e Veriut do të hapë një vendpushim në plazh, ndërsa Kim Jong-un synon turizmin

Koreja e Veriut do të hapë javën e ardhshme një vendpushim të ri turistik në bregun lindor të vendit, duke shënuar një përpjekje të re të udhëheqësit Kim Jong-un për të zhvilluar industrinë e turizmit. Zona bregdetare Wonsan-Kalma, që përfshin një plazh 4 kilometra të gjatë, hotele, restorante, qendra tregtare dhe një park ujor, pritet të akomodojë rreth 20,000 vizitorë në vit, sipas mediave shtetërore.

Ndërtimi i kompleksit nisi në vitin 2018, por u përball me vonesa për shkak të sfidave teknike dhe pandemisë COVID-19. Sipas Agjencisë Qendrore Koreane të Lajmeve (KCNA), resorti do të hapet për vizitorët vendas të martën, ndërsa mbetet e paqartë kur do të lejohet prania e turistëve të huaj.

Në ceremoninë e hapjes morën pjesë lideri koreano-verior Kim Jong-un, gruaja e tij Ri Sol-ju dhe vajza e tyre Kim Ju-ae, e cila mendohet të jetë trashëgimtarja e tij. I pranishëm si i ftuar special ishte edhe ambasadori rus Alexander Matsegora, një sinjal për afrimin gjithnjë e më të thellë mes Phenianit dhe Moskës.

Kim e përshkroi përfundimin e projektit si një nga sukseset më të mëdha të vitit dhe si një “hap krenar” drejt zgjerimit të turizmit. Ekspertët theksojnë se turistët rusë ka gjasa të jenë të parët që do të kenë akses, për shkak të lidhjeve të ngushta mes dy vendeve, të konsoliduara pas nënshkrimit të një traktati mbrojtjeje reciproke dhe dërgimit të trupave koreano-veriore për të ndihmuar Rusinë në luftën në Ukrainë.

Sipas analistit Lee Sangkeun nga Instituti për Strategjinë e Sigurisë Kombëtare të Koresë së Jugut, Pheniani ende përballet me sfida në marrëdhëniet me Kinën, por ka investuar shumë në sektorin e turizmit dhe nuk mund të shmangë pritjen e turistëve kinezë në të ardhmen.

Ndalesa për turistët e huaj, e vendosur që nga viti 2020 për shkak të pandemisë, ende nuk është hequr plotësisht, megjithatë grupe të përzgjedhura ruse janë lejuar të vizitojnë pjesë të caktuara të vendit.

© SYRI.net

Lexo edhe:

• Vala e të nxehtit në Itali lë 5 të vdekur, 17 qytete në alarm të kuq
• Trump: Irani po bën lëshime shumë të mëdha
• Rubio: Grupi teknik për Iranin do të ritakohet javën e ardhshme