Sekretari i Përgjithshëm i NATO-s, Mark Rutte, deklaroi se nuk ka asnjë shqetësim që presidenti amerikan Donald Trump publikoi një mesazh privat që i kishte dërguar atij, ndërsa udhëtonte drejt Holandës për samitin e liderëve të NATO-s.
“Çfarë i thashë në atë mesazh është plotësisht e saktë dhe nuk kam asnjë problem që ai e ndau publikisht”, tha Rutte gjatë fillimit të samitit në Hagë. “Mendoj se është thjesht një deklaratë faktike.”
Mesazhi, i publikuar nga Trump në platformën e tij Truth Social të hënën, lavdëronte përpjekjet e tij për të nxitur vendet anëtare të NATO-s të rrisin shpenzimet për mbrojtjen.
“Do të arrini diçka që asnjë president amerikan për dekada nuk e ka arritur. Europa do të paguajë më shumë, ashtu siç duhet, dhe kjo do të jetë fitorja juaj”, kishte shkruar Rutte në mesazh.
Një gazetar e pyeti nëse publikimi i këtij mesazhi e kishte shqetësuar.
“Absolutisht jo”, u përgjigj shkurt Rutte.
Gjatë të njëjtës udhëtim drejt Europës, Trump nuk shprehu mbështetje të plotë për nenin 5 të traktatit të NATO-s, që garanton mbrojtje të përbashkët në rast sulmi ndaj një anëtari. Megjithatë, Rutte theksoi se është i bindur për angazhimin e SHBA-së ndaj aleancës.
“Sipas meje, është e qartë se Shtetet e Bashkuara mbeten të përkushtuara plotësisht ndaj NATO-s dhe ndaj nenit 5. Po ashtu, ekziston edhe pritshmëria – që do të përmbushet sot – që Kanadaja dhe vendet europiane do të rrisin ndjeshëm shpenzimet e tyre për mbrojtjen,” shtoi ai.
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Vala e të nxehtit në Itali lë 5 të vdekur, 17 qytete në alarm të kuq
Trump: Irani po bën lëshime shumë të mëdha
Rubio: Grupi teknik për Iranin do të ritakohet javën e ardhshme