Irani ka ekzekutuar nëntë persona të akuzuar si anëtarë të grupit militant Shteti Islamik (ISIS), të cilët u arrestuan pas një përleshjeje me armë në vitin 2018 me Gardën Revolucionare në Iranin perëndimor. Mediat shtetërore raportuan se dënimet me vdekje janë zbatuar me varje, pasi u konfirmuan nga Gjykata Supreme e vendit.
Sipas agjencisë së lajmeve Mizan, përplasja e ashpër e ndodhur gjashtë vite më parë shkaktoi vdekjen e tre pjesëtarëve të Gardës Revolucionare dhe disa luftëtarëve të ISIS-it. Autoritetet iraniane deklaruan se pas operacionit zbuluan një arsenal armësh në strehimin e militantëve, përfshirë një mitraloz dhe rreth 50 granata.
Ngjarja e vitit 2018 konsiderohet si një nga përballjet më të rënda mes Iranit dhe ISIS-it, që ka kryer edhe më parë sulme të përgjakshme në territorin iranian. Në qershor të vitit 2017, ky grup mori përgjegjësinë për një sulm të koordinuar në parlamentin iranian dhe mauzoleun e Ajatollah Ruhollah Khomeinit, ku humbën jetën të paktën 18 persona dhe u plagosën mbi 50 të tjerë.
ISIS, që dikur kontrollonte pjesë të mëdha të Irakut dhe Sirisë nën një kalifat të vetëshpallur, ka humbur shumicën e territoreve pas një fushate ndërkombëtare ushtarake, por vijon të jetë aktiv në rajon. Në vitin 2024, grupi kreu dy sulme vetëvrasëse me bomba gjatë një ceremonie përkujtimore për gjeneralin iranian Qassem Soleimani, duke shkaktuar vdekjen e të paktën 94 personave.
Analistët paralajmërojnë se ISIS mund të përpiqet të rigjallërohet, sidomos pas rënies së regjimit të Bashar al-Assad në Siri, duke shfrytëzuar boshllëkun e krijuar për të forcuar praninë dhe rekrutimin në rajon. Ndërkohë, Irani ka rikonfirmuar vendosmërinë për të ndëshkuar ashpër çdo kërcënim nga grupet ekstremiste.
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Vala e të nxehtit në Itali lë 5 të vdekur, 17 qytete në alarm të kuq
Trump: Irani po bën lëshime shumë të mëdha
Rubio: Grupi teknik për Iranin do të ritakohet javën e ardhshme