Guardiola: Është shumë e dhimbshme ajo që shohim në Gaza, fëmijë që po vriten në spitale

A do të gjykohet edhe Pep Guardiola si antisemit?! Jashtë kornizës që jemi mësuar ta shikojmë, trajneri i Manchester Cityt mbajti një fjalim të fuqishëm kundër asaj që po ndodh në Gaza, gjatë ceremonisë së marrjes së një diplome nderi nga Universiteti i Manchesterit.

Guardiola deklaroi: “Është shumë e dhimbshme ajo që shohim në Gaza. Më dhemb në të gjithë trupin. Nuk ka të bëjë me ideologjinë, por ka të bëjë vetëm me dashurinë për jetën, për kujdesin ndaj fqinjit tënd. Ndoshta mendojmë se nuk është puna jonë, kur shohim fëmijët 4-5 vjeç që vriten me bomba në spitale, që nuk janë më spitale. Mund ta mendojmë këtë, por kujdes, sepse nesër mund të jetë radha jonë dhe fëmijët 4-5 vjeç mund të jenë fëmijët tanë. Që kur nisi ky makth në Gaza, çdo mëngjes kthehem dhe shikoj fëmijët e mi dhe po ju them, jam shumë i frikësuar”.

Atij iu dha doktoratura nderi nga kancelari i Universitetit të Mançesterit, Nazir Afzal, në Whitworth Hall.

Mbi atë që njerëzit mund të bëjnë për të bërë një ndryshim në lidhje me luftën në Gaza, Guardiola ndau një histori.

“Ka një histori që po ju kujtoj. Një pyll është në flakë. Të gjitha kafshët janë gjallë, të tmerruara, të pafuqishme. Por një zog i vogël fluturon para dhe mbrapa… duke mbajtur pika uji në sqepin e tij të vogël.

Një gjarpër qesh dhe pyet: ‘Pse vëlla? Ti nuk do ta shuash kurrë zjarrin”, tha 54-vjeçari.

"Zogu përgjigjet, po, e di… Unë thjesht po bëj pjesën time".

Guardiola tha se zogu e dinte që nuk mund ta ndalte zjarrin, por “nuk pranoi të bënte asgjë”.

"Në një botë që shpesh na thotë se jemi shumë të vegjël për të bërë një ndryshim, kjo histori më kujton se fuqia e dikujt nuk ka të bëjë me shkallën. Ka të bëjë me zgjedhjen, me paraqitjen, me refuzimin për të heshtur ose për të qëndruar në qetësi kur ka më shumë rëndësi".

Komentet e tij erdhën vetëm një ditë pasi forcat izraelite ndaluan një anije ndihmash me flamur britanik që synonte të thyente bllokadën e Rripit të Gazës.

Ekuipazhi prej 12 personash i anijes përfshinte aktivisten suedeze të klimës Greta Thunberg.

Madleen, e operuar nga Koalicioni i Flotiljes së Lirisë, synonte të dërgonte një sasi simbolike ndihme humanitare - duke përfshirë oriz dhe formulë për foshnje - në Gaza dhe të rriste ndërgjegjësimin ndërkombëtar për krizën humanitare atje.

Sipas zyrtarëve palestinezë të shëndetësisë dhe qeverisë, që nga tetori i vitit 2023, të paktën 54,880 palestinezë janë vrarë nga forcat izraelite, nga të cilët 28,000 janë gra dhe vajza .

Midis të vrarëve, të paktën 1,400 janë punonjës të sektorit të shëndetësisë, mbi 300 punonjës të ndihmës së OKB-së dhe më shumë se 220 gazetarë .

© SYRI.net

Lexo edhe:

• Vala e të nxehtit në Itali lë 5 të vdekur, 17 qytete në alarm të kuq
• Trump: Irani po bën lëshime shumë të mëdha
• Rubio: Grupi teknik për Iranin do të ritakohet javën e ardhshme