Francë/ Ndalohet aksesi i faqeve pornografike në internet

Kompania Aylo, e cila qëndron pas faqeve të njohura të përmbajtjes për të rritur si Pornhub, YouPorn dhe Redtube, njoftoi se do të pezullojë aksesin në platformat e saj në Francë duke filluar nga pasditja e së mërkurës.

Vendimi vjen në shenjë proteste ndaj kërkesave të reja ligjore franceze për verifikimin e detyrueshëm të moshës së përdoruesve që hyjnë në përmbajtje pornografike në internet.

“Në vend që të zbatojmë masa të pasigurta dhe joefektive, kemi marrë vendimin e vështirë për të pezulluar aksesin në faqet tona në Francë dhe për të përdorur platformat tona për të komunikuar drejtpërdrejt me audiencën franceze,” deklaroi Alex Kekesi, nënkryetar i Aylo, gjatë një konference për shtyp online.

Përdoruesit që përpiqen të hyjnë në Pornhub apo YouPorn do të përballen me një faqe njoftimi që përmban mesazhin e kompanisë dhe imazhin e veprës ikonike ‘La Liberté guidant le peuple’ të piktorit francez Eugene Delacroix.

Reagimi i autoriteteve franceze ishte i ashpër. Ministrja për Barazi Gjinore dhe Kundër Diskriminimit, Aurore Berge, komentoi në rrjetin X: “Pornhub, YouPorn dhe Redtube refuzojnë të respektojnë kuadrin tonë ligjor dhe kanë vendosur të tërhiqen. Aq më mirë! Do të ketë më pak përmbajtje të dhunshme, degraduese dhe poshtëruese të arritshme për të miturit në Francë. Mirupafshim.”

Ligji francez për mbrojtjen e të miturve nga përmbajtja për të rritur është në fuqi që nga marsi dhe kërkon që të gjitha platformat pornografike, pavarësisht nëse janë të themeluara brenda ose jashtë BE-së, të zbatojnë metoda efektive për të verifikuar moshën e përdoruesve.

Qeveria mbështet modelin e ‘anonimitetit të dyfishtë’, i cili lejon verifikimin e moshës pa ekspozuar identitetin personal të përdoruesit – zakonisht përmes një dokumenti identiteti ose fotografie.

Aylo kundërshton këtë metodë dhe propozon që verifikimi të bëhet në nivelin e pajisjes ose sistemit operativ, duke përfshirë mjete që ofrohen nga kompani si Google, Apple dhe Microsoft. Solomon Friedman nga Ethical Capital Partners, fondi që zotëron Aylo, e quajti qasjen franceze ‘të paarsyeshme, joproporcionale dhe joefektive’.

Ministrja franceze për Inteligjencën Artificiale dhe Çështjet Dixhitale, Clara Chapaz, e mbrojti politikën e vendit: “Kjo nuk ka të bëjë me stigmatizimin e të rriturve, por me mbrojtjen e fëmijëve tanë. Nëse Aylo preferon të largohet nga Franca në vend që të zbatojë ligjet tona, ky është problemi i tyre.”

Aylo raporton se platformat e saj gjenerojnë rreth shtatë milionë vizitorë ditorë vetëm në Francë.

Ndërkohë, Komisioni Evropian ka hapur hetime formale kundër disa faqeve të ngjashme, përfshirë Pornhub, në kuadër të Aktit të Shërbimeve Dixhitale (DSA), lidhur me mbrojtjen e të miturve nga përmbajtjet e papërshtatshme në internet. Syri.net-Kathimerini

© SYRI.net

Lexo edhe:

• Vala e të nxehtit në Itali lë 5 të vdekur, 17 qytete në alarm të kuq
• Trump: Irani po bën lëshime shumë të mëdha
• Rubio: Grupi teknik për Iranin do të ritakohet javën e ardhshme