NATO do t’i kërkojë Gjermanisë 40,000 ushtarë shtesë

NATO do t’i kërkojë Gjermanisë të rrisë kapacitetet ushtarake duke siguruar shtatë brigada shtesë, që përbëjnë rreth 40,000 ushtarë, si pjesë e objektivave të reja të Aleancës, raporton Reuters, duke cituar burime të ndryshme brenda organizatës.

Ky plan pritet të formalizohet gjatë samitit të ardhshëm të NATO-s, ku do të vendosen edhe kërkesa të tjera për shtetet anëtare, në një përpjekje për të rritur aftësitë mbrojtëse të Aleancës ndaj kërcënimeve, përfshirë ato nga Rusia.

Sipas një gjenerali të lartë, NATO synon të ketë në dispozicion 120 deri në 130 brigada, që përbën një rritje prej 50% krahasuar me objektivin aktual prej 80 brigadash.

Në këtë kuadër, Gjermania, e cila në vitin 2021 kishte rënë dakord të vendoste 10 brigada deri në vitin 2030, aktualisht disponon tetë të tilla dhe po zhvillon një tjetër në Lituani, me pritshmëri për vitin 2027.

Shtimi i 40,000 ushtarëve shtesë do të jetë një sfidë e madhe për Bundesëehr, veçanërisht duke pasur parasysh se ushtria gjermane ende nuk ka arritur objektivin e saj prej 203,000 ushtarësh, me një mungesë prej rreth 20,000 personash sipas Ministrisë së Mbrojtjes.

Burimet theksojnë gjithashtu se për të zbatuar planet e reja mbrojtëse, NATO do të ketë nevojë për 35 deri në 50 brigada shtesë në total, ndërsa Gjermanisë do t’i kërkohet të katërfishojë kapacitetet e mbrojtjes ajrore.

Këto masa vijnë në një kohë kur siguria evropiane po përcaktohet nga tensionet me Rusinë, ndërsa Aleanca synon të forcojë pozicionin e saj pa përfshirë ende tërheqjen e forcave amerikane nga kontinenti, një çështje që ka qenë objekt i debateve të mëparshme. Syri.net-iefimerida

© SYRI.net

Lexo edhe:

• Vala e të nxehtit në Itali lë 5 të vdekur, 17 qytete në alarm të kuq
• Trump: Irani po bën lëshime shumë të mëdha
• Rubio: Grupi teknik për Iranin do të ritakohet javën e ardhshme