BE do të dërgojë 650 zjarrfikës në zonat me rrezik të lartë nga zjarret

Që nga fillimi i vitit, më shumë se 166,000 hektarë janë djegur në të 27 shtetet anëtare, gati tre herë më shumë se mesatarja e regjistruar gjatë së njëjtës periudhë midis viteve 2003 dhe 2024.

Qindra zjarrfikës nga e gjithë Evropa dhe mbi 20 mjete ajrore zjarrfikëse do të pozicionohen paraprakisht në vende me rrezik të lartë për zjarre në të gjithë bllokun këtë verë, njoftoi Komisioni Evropian të hënën.

Pothuajse 650 zjarrfikës nga 14 vende evropiane do të vendosen në korrik dhe gusht në vende kyçe me rrezik të lartë në Francë, Greqi, Portugali dhe Spanjë. Ky është numri më i lartë, që kur filloi para-pozicionimi i zjarrfikësve në të gjithë BE-në në vitin 2022.

Greqia do të mirëpresë gjysmën e atyre zjarrfikësve evropianë me ekipe që vijnë nga Austria, Bullgaria, Çekia, Franca, Moldavia dhe Rumania.

Ndërkohë, 22 aeroplanë zjarrfikës dhe katër helikopterë do të stacionohen në 10 shtete të ndryshme anëtare.

Franca dhe Greqia do të jenë përfituesit më të mëdhenj të flotës verore të mbështetur nga BE-ja, e cila do të koordinohet dhe financohet nëpërmjet Mekanizmit të Mbrojtjes Civile të BE-së, me nga katër aeroplanë amfibë të mesëm secila. Franca do të ketë gjithashtu nga një helikopter.

Vende të tjera që marrin flotën e verës përfshijnë Kroacinë, Qipron, Çekinë, Italinë, Portugalinë, Sllovakinë, Spanjën dhe Suedinë.

Hadja Lahbib, Komisionerja e BE-së për Barazinë, Gatishmërinë dhe Menaxhimin e Krizave, tha në një deklaratë se "mbështetja e BE-së është e prekshme dhe bën një ndryshim në terren".

"Nxehtësia ekstreme dhe zjarret në Evropë për fat të keq janë bërë normaliteti i ri. Jam e lumtur që BE-ja ka më shumë për të ofruar, sesa vetëm fjalë shqetësimi dhe ngushëllimi", shtoi ajo.

Edhe 19 ekipe të tjera tokësore për shuarjen e zjarreve, me rreth 30 zjarrfikës secila, dhe një ekip këshillimi dhe vlerësimi, janë gjithashtu gati për t'u mobilizuar nga BE-ja, ndërsa një ekip i dedikuar për mbështetjen e zjarreve në Qendrën e Koordinimit të Reagimit ndaj Emergjencave (ERCC) të BE-së do të ngrihet 24/7, për të monitoruar rreziqet dhe për të analizuar të dhënat shkencore.

Do të bashkojë 30 ekspertë nga shtetet anëtare të BE-së, si dhe vende të tjera që marrin pjesë në Mekanizmin e Mbrojtjes Civile të Unionit, Partneritetin Shkencor Evropian për Rreziqet Natyrore (ARISTOTLE) dhe stafin e ERCC-së.

Greqia, e cila gjithashtu tenton të goditet rëndë çdo verë, ka njoftuar tashmë se do të dërgojë një numër record zjarrfikësish, duke përfshirë njësi elitare në zona me rrezik të lartë, dhe pothuajse do të dyfishojë flotën e saj të dronëve.

166,000 hektarë të djegur

Që nga fillimi i vitit, më shumë se 166,000 hektarë janë djegur në 27 shtetet anëtare, gati tre herë më shumë se mesatarja e regjistruar gjatë së njëjtës periudhë midis viteve 2003 dhe 2024, sipas Sistemit Evropian të Informacionit për Zjarret në Pyje (EFFIS).

Rumania ka qenë shteti anëtar i BE-së më i prekur deri më tani këtë vit, me më shumë se 120,000 hektarë të shkatërruar nga zjarri. Autoritetet  kanë fajësuar për disa nga zjarret, njeriun, përfshirë djegien e qëllimshme për të pastruar fushat.

Franca dhe Spanja vijnë më pas, por të dy vendet, të cilat tradicionalisht janë më të prekura nga zjarret, kanë pasur përvoja të ndryshme. Gati 19,000 hektarë ishin djegur në Francë deri më 20 maj, rreth 2.75 herë më shumë se mesatarja e 20 viteve të fundit, ndërsa në Spanjë, numri i këtij viti është shumë më i ulët se mesatarja 20-vjeçare (8,195 hektarë kundrejt 13,059).

Sipërfaqet kumulative të djegura të vitit të kaluar arritën në 383,317 hektarë, mbi mesataren e 20 viteve të fundit. Vitet më shkatërruese të dekadës së kaluar ishin në vitin 2017 dhe 2022, kur gati një milion dhe pak më pak se 800,000 hektarë u rrafshuan me tokë përkatësisht.

Ndryshimi i klimës dhe ndryshimet demografike

Për përhapjen e zjarreve në Evropë, faji është gjetur te ndryshimet klimatike, të cilat kanë çuar në temperatura më të larta, thatësirë ​​të zgjatur dhe modele të paparashikueshme të motit, si dhe ndryshimeve demografike që kanë çuar në shkretëtirëzimin e zonave rurale në favor të qendrave urbane, që do të thotë se toka nuk menaxhohet më në të njëjtën mënyrë.

Sezoni i zjarreve, për shembull, është zgjatur përtej muajve tradicionalë të verës dhe tani përfshin nga fillimi i majit deri në fund të tetorit, ndërsa gjithnjë e më shumë vende në Evropën lindore dhe veriore po fillojnë të përjetojnë zjarre të tilla.

Sipas Observatorëve Evropianë dhe Globalë të Thatësirës, të Qendrës së Përbashkët Kërkimore të Komisionit, ka kushte paralajmëruese për thatësirë ​​në rajonin e Detit Baltik, Francën veriore, Beneluksin, disa rajone të Gjermanisë, Poloninë, Çekinë, Sllovakinë, Rumaninë perëndimore, Bullgarinë dhe disa rajone të Greqisë.

Megjithatë, pjesa më e madhe e Spanjës, Italisë dhe Francës jugore ose nuk kanë kushte thatësire ose janë në rimëkëmbje./ Euronews.

© SYRI.net

Lexo edhe:

• Vala e të nxehtit në Itali lë 5 të vdekur, 17 qytete në alarm të kuq
• Trump: Irani po bën lëshime shumë të mëdha
• Rubio: Grupi teknik për Iranin do të ritakohet javën e ardhshme