Presidenti amerikan Donald Trump mund të mos marrë pjesë në samitin e ardhshëm të NATO-s nëse vendet e tjera anëtare të aleancës së mbrojtjes nuk veprojnë në drejtim të ndarjes së barrës, raportoi Reuters, duke cituar media lokale.
Revista Spiegel, duke cituar burime diplomatike europiane, raportoi se Gjermania, në veçanti, është vënë nën presion për të rritur shpenzimet për mbrojtje.
Javën e shkuar, sekretari amerikan i mbrojtjes Pete Hegseth diskutoi gjithashtu këtë çështje me homologun e tij gjerman, Boris Pistorius.
Trump ka tronditur aleatët duke kërcënuar se do të mbrojë vetëm ata që, sipas tij, shpenzojnë mjaftueshëm për mbrojtjen, ndërsa u bën presion për të rritur buxhetet ushtarake.
“Është çështje arsyetimi të thjeshtë, apo jo?” u kishte thënë Trump gazetarëve në Zyrën Ovale në mars. “Nëse nuk paguajnë, nuk do t’i mbroj. Jo, nuk do t’i mbroj.”
Sipas AFP-së, administrata e tij ka sugjeruar gjithashtu se mund të zhvendosë forcat ushtarake nga Europa për t’u përqendruar në kërcënime të tjera, si Kina.
Qëndrimet e administratës Trump ndaj NATO-s kanë ngritur pikëpyetje rreth bllokut transatlantik, i cili ka qenë shtylla kryesore e sigurisë europiane për 75 vitet e fundit.
Muajin e shkuar, kreu i NATO-s Mark Rutte minimizoi komentet e Trump-it për aleancën, duke thënë se ai nuk e ka minuar angazhimin e Nenit 5 për mbrojtje të përbashkët dhe se prania ushtarake konvencionale amerikane do të mbetet në Europë.
“Qëllimi nuk është që SHBA të largohet nga NATO apo nga Europa, SHBA-ja është këtu. Ata do të zhvendosin më shumë fokusin drejt Azisë, dhe kjo, me kalimin e kohës, mund të thotë se do të duhet të rivendosin ekuilibrin,” tha Rutte, sipas AFP-së.
“Por aktualisht, dhe do të vazhdojë të ketë, në Europë një prani bërthamore dhe gjithashtu konvencionale të Shteteve të Bashkuara.”
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Danimarka miraton vendosjen e misionit në Ngushticën e Hormuzit
VIDEO/ Ukraina shënjestron objektivat ruse, godet depo nafte e ura strategjike
Vala e të nxehtit në Itali lë 5 të vdekur, 17 qytete në alarm të kuq