Paga e CEO-ve globalë është rritur 56 herë më shumë se pagat e punëtorëve që nga viti 2019

Paga mesatare e drejtuesve ekzekutivë në botë është rritur ndjeshëm gjatë viteve të fundit, duke tejkaluar ndjeshëm rritjen e pagave të punëtorëve të zakonshëm, sipas një studimi të publikuar nga Oxfam me rastin e 1 Majit, Ditës Ndërkombëtare të Punëtorëve.

Gjetjet e raportit bazohen në një anketim të zhvilluar në 2,000 kompani në 35 vende, ku drejtuesit fitonin mbi 1 milion dollarë (885,000 euro) në vitin 2024. Sipas Oxfam, paga reale e CEO-ve është rritur me 50% që nga viti 2019, ndërsa ajo e punëtorëve vetëm me 0.9%, duke bërë që hendeku mes tyre të zgjerohet ndjeshëm.

Në raport theksohet se në Evropë, Irlanda dhe Gjermania shfaqin disa nga drejtuesit më të paguar, me paga mesatare përkatësisht 6.7 milionë dhe 4.7 milionë dollarë në vit. Ndërkohë, në vende si Afrika e Jugut dhe India, pagat e CEO-ve ishin mesatarisht më të ulëta, me 1.6 dhe 2 milionë dollarë.

Drejtori Ekzekutiv i Oxfam International, Amitabh Behar, e cilësoi këtë zhvillim si një pasojë të qëllimshme të sistemit aktual ekonomik. “Ky nuk është një defekt në sistem – është vetë sistemi që funksionon kështu, duke e kanalizuar pasurinë gjithnjë e më lart”, tha ai.

Ndërkohë, raporti thekson edhe pabarazinë gjinore në nivelet drejtuese: nga mbi 45 mijë kompani ku CEO-t fitonin më shumë se 10 milionë dollarë në vit, më pak se 7% kishin në krye një grua.

Sekretari i Përgjithshëm i ITUC, Luc Triangle, akuzoi korporatat për përfitime rekord ndërkohë që shmangin taksat dhe përgjegjësinë sociale, ndërsa punëtorëve u mohohen kushtet bazë të jetesës.

Raporti ngre shqetësime edhe për përqendrimin ekstrem të pasurisë, duke theksuar se miliarderët fituan mesatarisht 206 miliardë dollarë në vitin e kaluar – ekuivalente me 23,500 dollarë në orë, më shumë se të ardhurat vjetore të një qytetari mesatar global.

Pavarësisht një rritjeje prej 2.7% në pagat reale globale në vitin 2024 sipas të dhënave të ILO-s, shumë vende si Franca, Spanja dhe Afrika e Jugut përjetuan rritje minimale, rreth 0.6%. Oxfam paralajmëron se pabarazia në të ardhura mbetet alarmante, veçanërisht në vendet me të ardhura të ulëta, ku 10% më të pasurit fitojnë 3.4 herë më shumë se 40% më të varfrit./ Euronews - Syri.Net

© SYRI.net

Lexo edhe:

• Danimarka miraton vendosjen e misionit në Ngushticën e Hormuzit
• VIDEO/ Ukraina shënjestron objektivat ruse, godet depo nafte e ura strategjike
• Vala e të nxehtit në Itali lë 5 të vdekur, 17 qytete në alarm të kuq