Afganistan/ Talebanët po shkatërrojnë ekonominë e vendit, duke mos lejuar gratë që të punojnë

Kufizimet e rënda të vendosura ndaj grave afgane nga regjimi taleban jo vetëm që kanë izoluar gjysmën e popullsisë nga jeta publike, por po shkaktojnë edhe një dëm ekonomik të konsiderueshëm, paralajmëron Programi i Zhvillimit të Kombeve të Bashkuara (UNDP).

Sipas një raporti të fundit, Afganistani pritet të humbasë rreth 6% të Prodhimit të Brendshëm Bruto (PBB) deri në vitin 2026 për shkak të përjashtimit të grave nga tregu i punës dhe jeta sociale.

Sipas raportit, kufizimet që filluan të zbatohen në vitin 2021, pasi talebanët rimorën kontrollin e vendit, do të rezultojnë në humbje kumulative prej 920 milionë dollarësh mes viteve 2024–2026.

Gratë janë larguar nga universitetet, parqet, palestrat, sallonet e bukurisë, dhe pjesëmarrja e tyre në fuqinë punëtore është reduktuar në mënyrë drastike.

“Kjo është një goditje serioze për ekonominë,” tha për AFP nga Kabuli drejtori i UNDP-së në Afganistan, Steven Rodriguez.

Përpara rikthimit të talebanëve në pushtet, rreth 15% e grave afgane ishin të punësuara. Sot, kjo shifër është përgjysmuar, duke zbritur në vetëm 7%.

Rodriguez nënvizon se rikthimi i grave në punë dhe lejimi i tyre për të udhëtuar pa shoqërues mashkull do të kishte ndikim të menjëhershëm pozitiv, jo vetëm për ekonominë vendase, por edhe për perspektivën e mbështetjes ndërkombëtare.

Sipas UNDP, izolimi i grave nuk është thjesht çështje e të drejtave të njeriut, por edhe një vendim që po fundos ekonominë e një vendi tashmë të dobët.

Afganistani tashmë përballet me krizën e dytë më të madhe humanitare në botë, pas Sudanit, dhe perspektivat nuk duken pozitive pa ndryshime strukturore. Syri.net-CNN.gr.

© SYRI.net

Lexo edhe:

• Danimarka miraton vendosjen e misionit në Ngushticën e Hormuzit
• VIDEO/ Ukraina shënjestron objektivat ruse, godet depo nafte e ura strategjike
• Vala e të nxehtit në Itali lë 5 të vdekur, 17 qytete në alarm të kuq