Koreja e Veriut ka pranuar për herë të parë se ka dërguar trupa për të luftuar përkrah forcave ruse në luftën kundër Ukrainës. Njoftimi zyrtar erdhi të hënën nga Komisioni Qendror Ushtarak i Partisë së Punëtorëve, duke konfirmuar se dërgimi i trupave ishte bërë në bazë të traktatit të mbrojtjes reciproke mes Phenianit dhe Moskës.
Sipas deklaratës të publikuar nga mediat shtetërore, udhëheqësi Kim Jong-un përshëndeti ushtarët si “heronj” dhe “përfaqësues të nderit të atdheut”, duke theksuar se vendimi i tyre ka dhënë një “kontribut të rëndësishëm” në çlirimin e territoreve ruse të pushtuara nga Ukraina.
Lajmi vjen pasi Rusia njoftoi të shtunën se kishte rimarrë plotësisht kontrollin në rajonin e Kurskut, i humbur përkohësisht gjatë një inkursioni të papritur ukrainas. Shefi i Shtabit të Përgjithshëm të Forcave të Armatosura ruse, Valery Gerasimov, konfirmoi gjithashtu se trupat e Koresë së Veriut luftuan përkrah ushtarëve rusë në atë zonë, duke vlerësuar profesionalizmin dhe heroizmin e tyre në betejë.
Që nga vjeshta e kaluar, Ukraina, Shtetet e Bashkuara dhe Koreja e Jugut kishin akuzuar Korenë e Veriut për dislokimin e 10,000 deri në 12,000 trupave në Rusi, akuzë të cilës Moska dhe Pheniani deri më tani i ishin përgjigjur në mënyrë të paqartë, duke mohuar përfshirjen direkte në luftime dhe duke theksuar vetëm bashkëpunimin ushtarak në përputhje me ligjin ndërkombëtar.
Pranimi i drejtpërdrejtë nga Pheniani shënon një zhvillim të ri dhe të rëndësishëm në marrëdhëniet ushtarake midis dy vendeve dhe rrit shqetësimet ndërkombëtare për përshkallëzimin e konfliktit në Ukrainë.
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
Vala e të nxehtit në Itali lë 5 të vdekur, 17 qytete në alarm të kuq
Trump: Irani po bën lëshime shumë të mëdha
Rubio: Grupi teknik për Iranin do të ritakohet javën e ardhshme